NEET Exam paper putru chungchanga lungawilohna lantir te thlawpin Aizawl-ah punkhawm neih a ni

Zonuna Kawlni (LENKAWL) • July 23, 2026 • Comments • Mizoram

Kumin-a NEET-UG exam zawhna put ru avanga Union Education Minister, Dharmendra Pradhan bang tura phuta Delhi khawpui Jantar Mantar-a pungkhawmte thlawpna lantirin nimin chawhma dar 10:00 atang khan Aizawl-a Vanapa Hall tual-ah thalaite leh zirlai tam tak an pungkhawm.
 Pawl huaihawttu bik awm lova he punkhawm neih ah hian kumin-a NEET Exam kaihhnawih avanga nunna chan tawhte sunna hun tawi hman niin hemi hnu hian punkhawm kaihruaitute chuan he hmunah hian pawl bik buatsaiha pungkhawm an nih loh thu leh zirlai dikna chanvo humhim tura pungkhawm an nih zawk thu an sawi a. He punkhawm hi an chochhuah ni lovin, zirna lama System thalo duangtute chochhuah zawk a nih thu an sawi bawk.

Punkhawmnaah hian kalkhawmte chuan India rama exam kalpui danah rinawmna, mawhphurhna lakna leh dikna a awm ngei nan leh zirna kalphung siamthat a nih thuziak hrang hrang an keng a, he hunah hian thusawitu hrang hrangte chuan zirlai harsatna tawktute an thlawp tlat tur thu leh Gen Z-te chu chhawrtlak loh an nih loh thu sawiin, chhawr an nih loh thu an au chhuahpui bawk a. Boruak muanawm tak hnuaiah punkhawm hi neiin chawhnu dar 3:00 vel-ah he punkhawmna a tel te hi an tin darh chauh a ni.

Mizo thalai zirlai pungkhawmin kumin leh kum danga NEET Examination paper pût-ru dona leh dem a neia an dikna chanvo atana an beihna hi ZPM chuan an thlawp tlat thu ZPM Media & Publicity Department Chairman B. Lalchhanzova chuan thuchhuah siama tarlangin, “Zirlai thalaite manganna hi thinlung takin ZPM chuan a takin kan tawrhpuiin kan hriatpui a ni” a ti a. MNF Party pawhin Mizote thalai rualin an dikna chanvo humhalh nana huaisen taka an penchhuak chu lawmawm an tih thu leh an thlawp thu nimin vek khan thu-chhuah siamin an tarlang bawk.

National Students' Union of India (NSUI) Mizoram pawhin NEET leh Exam dang engemaw zata Paper leak nasa tak avang leh hemi kaihhnawiha India ram zirlaiten lungawi lohna an lantir mek chu an thlawp thu thuchhuah siamin an tarlang bawk.