East Lungdar VC by-election neih hun tur puan a ni

Serchhip District chhung East Lungdar Village Council-a seat ruak pakhat awm hnawhkhat turin thla thar August 20 khian by-election neih a ni dawn.
Mizoram State Election Commission chuan nimin khan thuchhuah siamin East Lungdar VC a by-election neih hun tur hi a puang a, he inthlan neih tur atan hian July 27, 2026-ah hriattirna ti-chhuakin inthlan chuh tumte tan August 3, 2026 tlai dar 3:00 thleng hming pekluh theih a ni dawn a, hming pekluh te chu a tuk, August 4, 2026-ah endik lehin August 6, 2026 tlai dar 3:00 thlengin inhnukdawk duhte tan hun hawn a ni ang. VC by-election neih tur atan hian August 20, 2026 zing dar 7:00 atanga tlai dar 5:00 thlengin Vote thlak a ni dawn a, Vote thlak zawhfel a nih veleh Vote tla te hi chhiar nghal tur niin Vote thlak that ngai a awm chuan a tuk, August 21-ah Vote hi thlak that tur a ni anga, August 25, 2026-ah chuan inthlan kaihhnawih hi zofel tura ruahman a ni.

He inthlanna neih tur puan a nih rual hian East Lungdar VC huamchhungah Model Code of Conduct (MCC) hman nghal tur niin By-Election inthlan result puan thleng a huam dawn a ni.

East Lungdar Village Council-ah hian Member 7 awmin General Seat-a thlantlin Member pakhat, President nilai chu a boral avangin by-election hi neih a ngai a. Tun thla ni 7 khan Final Electoral Roll pawh tarchhuah ni tawhin East Lungdar Village Council-ah hian In 624 a awm a, Vote nei mipa 1112 leh hmeichhia 1248, an vaiin Vote nei 2360 an awm a ni.

Tun dinhmunah East Lungdar VC-ah hian ZPM Party chuan Member pathum nei mekin MNF in pahnih leh Congress in pakhat an nei mek a, tun tuma inthlan result a zir hian Executive body a danglam thei dawn niin a lang a. ZPM Party chuan he inthlanna neih tura an Candidate tur hian F. Lalchawimawia chu an lo puang tawh a, Party dang te erawh chuan an Candidate tur hi an la tifel lo nia thudawn a ni.