SPB Vice Chairman in NITI Aayog Member a kawm

Mizoram State Planning Board Vice Chairman Dr. Kenneth Chawngliana chuan niminpiah khan NITI Aayog Member, Rajiv Gauba chu New Delhi-ah kawmin Mizoram hmasawnna kawnga thawhhona tihchak dan tur leh Viksit Bharat @2047 tumram thlenna tur chungchang te an sawidun.

He inkawmna ah hian State Planning Board Vice Chairman Dr. Kenneth Chawngliana chuan NITI Aayog-in State Support Mission kaltlanga Mizoram a lo puih avangin State Institution for Transformation (SIT) Mizoram din a nih theih bakah Transformed Mizoram Vision 2047 buatsaih theih a nih avangin lawmthu a sawi a. Mizoram sawrkar pawhin NITI Aayog nen thawhhona tha chu a chhunzawm zel dawn tih a sawi bawk. Mizoram chu Vision 2047 buatsaih hun atanga Implementation hna lamah a luh tawh thu pawh sawiin, Sector hrang hrang Roadmap, kumtin Action Plan, Flagship Programme leh Project Pipeline-te siam mek niin State Support Mission 2.0 hmangin Technical Support, Institutional Support leh Ministry hrang hrang thawhhona chu a ngaih pawimawh thu a sawi bawk a ni.

Tourism hmasawnna pawh tarlangin Dr. Kenneth Chawngliana chuan, Mizoram-ah Rel a lo luh ve tawh avangin kum 2025-26 chhungin Tourist lo kal zat chu nuai 9.81 vel a tling tawh tih sawiin, Tourism Sector hmasawnna tur kawng tam tak a inhawng tawh tih a sawi a. Hemi zulzui hian Aizawl-ah Mizoram Tourism Conclave buatsaih turin NITI Aayog a sawm nghal bawk a ni.

He inkawmna ah hian Mizoram Ginger Mission kalphung pawh en ho niin Mizoram chu ‘Ginger Capital of India’ tia hriat a nih hnuah Ginger Sector hian ram pum huapa ngaihvenna a dawng nasa tawh tih Dr. Kenneth Chawngliana chuan a sawi a. Rajiv Gauba leh NITI Aayog Member dangte Mizoram tlawh turin a sawm bawk a ni.