NE State te tana Disaster Fund pek sawihona neih a ni

Central Sawrkar in 16th Finance Commission hnuaia khuarel chhiatna kaihhnawiha North East State te tana sum a pekchhuah chungchanga hmalak dan tur chu nimin khan Video Conferencing hmangin sawiho a ni a, he hunah hian Mizoram atangin DM&R Minister, Prof. Lalnilawma pawh a tel a ni.

Tunhnai a Chief Minister Lalduhoma hova Mizoram State Disaster Management Authority (SDMA) thutkhawmah 16th Finance Commission kaltlanga khuarel chhiatna chungchang a DM&R Department in Fund a dawn tur chungchang hi tarlan a lo ni tawh a. Hetah hian North East State dangte berawnin, a huhova hmalak dan kawng zawn nise tih a ni a. 16th Finance Commission in State tin ten khuarel chhiatna chungchanga DM&R Fund an chan tur a chhut dan tehfung an rawn hman hi North East State te’n khuarel chhiatna an tawh thin ang te, a ram mil ang leh mamawh dan ang mil a chhut a ni lo anga hriatna leh an chan tur leh hmuh tur ang Fund an hmu pha lova hriatna a awm a, hei hi North East State ten a huhova Central Sawrkar lamah thlen nise tih a nih avangin he thutkhawm hi neih a ni.

He thutkhawm ah hian DM&R Minister Prof.Lalnilawma chuan Hmarchhak State-te hian khuarel chhiatna avangin harsatna hrang hrang kan tuar nasa thin tih sawiin, heng harsatna te sutkian nan leh DM&R lamah tun aia tha zawk leh rang zawka hma kan lak zel theih nan 16th Finance Commission kaltlanga DM&R tan kan Fund hmuh dan chungchangah hmarchhak State-te kan tanrual a, sawrkar laipui nen thukhat vua a hma kan lak zel a pawimawh thu a sawi bawk.

He sawihona ah hian State tin ten mahni dinhmun lo zirchiang a, an hmalak zel dan tur ngaihtuah nise an ti a. An ngaihtuahna te chu remchang hmasa berah Guwahati-ah sawiho leh nise an ti bawk.