NEET-UG Exam Question paper leak out vangin MZP ten naktuk-ah punkhawm neih an tum
MZP hian nimin khan Aizawl-a MZP Conference Hall-ah Executive Committee Meeting vawi 653-na neiin NEET-UG Exam Question Leak out chungchang hi an sawiho a. NEET-UG Exam Question paper leak out avanga India ram pum huapa zirlai tam takin harsatna an tawk leh mi tam takin nunna hial an chan chu pawi an tih thu sawiin, he thil avang hian Mizo zirlai sang chuang fe pawhin an tuar ve bawk tih an sawi a. Queston leak out avanga harsatna thleng mek te demna leh hun lokal tura zirna kalphung felfai zawk a awm theihna turte, Exam system thianghlim zawk a awm theihna tur leh zirlai rilru thianghlim tak tak ten hetiang thila harsatna tawk an awm tawh lohna turin MZP General Headquarters bultumin July 23, 2026 (Ningani) chawhma dar 11:00 hian Aizawl-a Vanapa Hall kawt-ah ‘Peaceful Protest’ neih nise an ti a. Mizo mipui leh zirna ngai pawimawhtu te zawng zawng he huna tel tur hian sawiin, MZP Headquarters leh Sub-Headquarters te pawh mahni huamchhungah an remchan anga hma lo la ve turin an hriatir nghal bawk a ni.
Nimin-a MZP thukhawm hian Election Commission of India in Mizoram-a Special Intensive Revision (SIR)-a kalpui mek chungchang pawh an ngaihtuah nawn leh bawk a, Voters pun tam zualna khaw thenkhat-a hearing an neih hunah a theih ang anga kalchih nise an ti a. Hei bakah hian Election Commission of India leh Mizoram Election thuneitute pawh a rang thei ang bera sawipui nise an ti bawk.
MZP General Hqrs. Executive Committee thukhawm hian Under Graduate (UG) Gold Medalist, MZP chhungkua, College Student’s Union (SU) leh Hnampual hruaitu zirnaa hlawhtlina changte chu tun thla ni 30 khian lawmpuina leh chawimawina hun hman nise an ti a. MZP Rorelna sang ber, MZP Assembly chu kumin September 23 atanga 25 chhung khian neih tura relin, MZP Assembly thleng duhte tan July 31, 2026 thlengin dilna thehluh theih a ni a. Assembly Organising Committee din nghalin Chairman atan Sanghmingthanga, Vice President leh Secretary atan Lalentlinga, Asst. Gen. Secretary te ruat an ni bawk.