Chakma khaw thenkhat-a Voters pung chakah hmalak tum

Mizo Zirlai Pawl (MZP) chuan Special Intensive Revision neih mek a Chakma khaw thenkhata voter pung tam lutuk chu Central Young Chakma Association (CYCA) leh Mizoram Chakma Student Union (MCSU)-te nen a hmun a kal chilh a, a tul ang a hmalak an tum tih an sawi. 

MZP General Headquarters hruaitute chuan nimin khan Aizawl-a an Pisa-ah thuthar thehdarhtute  kawmin he thu hi an sawi a, sawrkar laipuiin a phut anga Special Intensive Revision neih mekah Chakma khaw thenkhat a voter punna chu a nasat lutuk thu leh hei hi thil rinhlelh awm tak a nih thu te, Document lem hmanga Voter ID hial siam an tam ni a thu an dawn thu te bakah Aadhar Card pawh a lem a siam thei an awm nia an ngaih avangin fimkhur a ngai hle tih an sawi a. A bik takin Red Zone leh Yellow Zone-a Election Officer, ARO leh AERO te chu fimkhur tura an duh thu leh Chakma khaw 59 te chu uluk lehzuala ennawn an duh tih an sawi bawk.

MZP General Headquarters hruaitute chuan West Bengal-a Special Intensive Revision kalpuina-ah pawh West Bengal huamchhunga Chakma awmte’n Mizoram document an neih nual thu leh heng document te hi enfiah tura Mizorama rawn thawn a awm nual niin an sawi bawk a. CEO Mizoram chu Electoral Roll buaipui fel a nih hma chu a hna hi tha taka vil tura an phut thu pawh an sawi bawk.