East Lungdar VC Electoral Roll thar tlangzarh a ni
East Lungdar Village Council Electoral Roll siam thar hi nimin khan Serchhip DC Meeting Hall-ah District Election Officer leh Bawrhsap, Paul L. Khuma chuan tlangzarhin District Election Officer Paul L. Khuma chuan E. Lungdar-ah VC tanglai a boral avangin By-Election neih a tul thu sawiin, Final Roll peihfel a ni ta chu lawmawm a tih thu a sawi a. By-Election neih hunah pawh inthlanna fel leh thianghlim, muanawm tak a awm theih nan he huna kalkhawmte chu thawhpuiah sawmin, boruak tha lo a lo awm palh a nih pawha thelh daitu ni turin a sawm a. VC Final Electoral Roll chu tlangzarhin ERO leh Polical Party hrang hrangte hnenah a hlan nghal a ni.
He hunah hian Serchhip Election Officer, Lalchhanhimi chuan Electoral Roll tlangzarh tak sawiin, Draft Electoral Roll atan hian kum 2025-a VC Election Final Roll hman niin, June ni 12, 2026 khan Draft Electoral tlangzarh a nih thu a sawi a. Siam that ngai leh inthun thar duh te tan June 12 atanga 24, 2026 chhung hawn niin January 1, 2026-a kum 18 tling chinte thun thar theih an ni a. Inthun thar dilna lut te chu June 25, 2026 khan ERO, East Lungdar BDO Dr. Marylin Lalruatkimi kaihhruaia neih a nih thu a sawi bawk.
Electoral Roll thar atanga a lan danin E. Lungdar Village Council huamchhung ah hian In 620 awm thin chu In 624 a ni ta a, Electoral Roll-a lut thar Mipa 35 leh hmeichhia 52, an vaiin 87 an nih laiin, paih ngai mipa 41 leh hmeichhia 7, an vaiin 48 an awm thung a. Heti hian Final Electoral Roll-a hming chuang zawng zawng chu mipa 1112 leh hmeichhia 1248, an vaiin 2360 an ni. East Lungdar VC-ah hian Seat 7 awmin an VCP chu tunhnaiah a boral avangin Seat ruak pakhat a awm a, by-election hi neih a ngai dawn a ni.