CADC-ah BJP leh ZPM intawm sawrkar lakluh a ni
CADC-ah hun engemaw chen sawrkar mumal a din theih loh hnuah MDC 10 nei BJP leh MDC 9 nei ZPM te chuan Chakma Democratic Alliance Legislature Pary dinin an hruaitu atan BJP MDC, Nirupam Chakma chu thlangin nimin khan CEM thar lakluhna inkhawm hi CADC Art & Cultural Hall, Kamalanagar-II ah neih a ni a, he hunah hian Lawngtlai Bawrhsap Donny Lalruatsanga chuan rinawmna thutiam lak tirin Nirupam Chakma chu CADC Chief Executive Member (CEM) atan a lalut a ni.
CADC-a CEM thar Nirupam Chakma chuan CADC-a sawrkar mumal leh ngelnghet tak awm tura hma latute, Mizoram Governor, Chief Minister, DCMA changtu Minister leh Chakma Democratic Alliance Legislature Pary-te chungah lawmthu a sawi a. CADC-ah huapzo, langtlang leh mipui sawrkar din tura hmalak a nih tur thu a tarlang a. Hmasawnna kawng hrang hrang- Zirna, Kawlphetha, kawngpui tha, thalaite tana hna thar siam leh a dangte ngaihpawimawh a nih tur thu a sawi bawk. He hunah hian District Council & Minority Affairs Minister, C. Lalsawivunga pawh telin hun rei tak Governor's Rule-a an awm hnua CADC-ah sawrkar thar lakluh a ni chu lawmawm a tih thu a sawi bawk.