MPCC-in FCRA siamthat duh lovin ‘Black Day’ an hmang

Mizoram Pradesh Congress Committee (MPCC) chuan Foreign Contribution (Regulation) Act (FCRA), Amendment Bill 2026 leh Kristiante nekchepna duh lohna lantirna atan nimin khan ‘Black Day’ an hmang a, FCRA (Amendment) Bill, 2026 duh lohna resolution paruk (6) an pass bawk.

MPCC hian Aizawl-a Vanapa Hall kawt-ah ‘Black Day’ hi hmangin he huna thu sawitu MPCC Sr. Vice President Lalnunmawia Chuaungo chuan FCRA chu kum 2010-a Central-a Congress sawrkar kaihhruaiin a siamthat khan a kimin a fel tâwk viau tawh tih a sawi a. Kum 2016, 2018 leh 2020-ah vawi tam tak an lo tidanglam tawh nia sawiin, Dan tharah chuan dik taka rorel a nih theihna tûr atân a diltu emaw a tuartu emaw in thiam thu an sawi ve theihna pêk a ni dawn tawh lo tih a sawi a. Hei bakah hian Home Ministry-in thutlukna an siam, Entirnan Synod emaw, pawl engemaw ber pawhin Certificate dilin lo nghak mah sela, Home Ministry-in an duh chuan an paih tlang thei a, an hnawl tlang thei a. Lo hnawl ta sela appeal-na tûr kha he Dan thar-ah hian a awm tawh lo tih sawiin, “Mizoram-a Kristian-te tân chuan do ngei chi a ni,” a ti a, State sawrkar dinglai chu hemi kawnga hma la thei ber a ni tih sawiin, Mizoram Lok Sabha MP, Richard Vanlalhmangaiha chu Parliament Session-a hemi chungchanga auchhuak ve turin an phut tih a sawi a ni.

ADCC President Lalroenga chuan MPCC-in FCRA (Amendment) Bill, 2026 an duh lohna Resolution Point 6 - FCRA Amendment Bill, 2020 hi BJP kaihhruai Sawrkar Laipuiin hnûkkîr leh rawh se; India rama Kristian-te chunga hleilenna thleng thîn hi tâwp tûrin BJP kaihhruai Sawrkar Laipuiin hma la rawh se; India rama Kristian-te thlavang hauh turin Mizoram Chief Minister pen chhuak ve tawh rawh se; FCRA Amendment Bill, 2020 hi Kristian-te tâna a that loh em avângin hnûklêt leh tura nasa taka nawr tûrin Mizoram Chief Minister hian Kohhran hruaitute, NGO hruaitute leh Political Party tin hruaitute sawm khâwmin Prime Minister hmuh pui rawh se; FCRA Amendment Bill, 2020 hi Parliament-a putluh a nih hunah Mizoram MP-ten dodala thu sawiin, vote thlâk hunah hai mai lovin a dodal zawngin vote thlâk rawh se tih leh Mizoram Legislative Assembly-ah FCRA Amendment Bill, 2020 dodalna Resolution pass a nih theih nan Mizoram Sawrkarin Assembly Session ko rawh se chu pulutin an pass bawk a ni.

Lunglei Venglai-ah pawh Congress Party buatsahin Black Day hi hman a ni a, LDCC President R. Lalnunthara chuan FCRA Amendment Act chu rawngbawlna ah harsatna siamtu leh NGO ten midang tanpuina tur a hma an lakna dodalna a nih avangin theihtawpin an dodal dawn tih a sawi bawk.