Mizoram-ah Remna ni urhsun takin hman a ni

Nimin June ni 30, 2026 kha MNF leh India sawrkar in inremna thuthlung an ziah champhaphak, ‘Remna Ni’ a ni a, Remna Ni vawi 40-na hi ramchhung hmun hrang hrangah urhsun taka hman a ni.
    Kum 1966-a MNF-te'n India laka hel-a zalenna an sual hnuah India Constitution huangchhunga inremna zawngin vawi tam tak inbiakna neih a ni a, tharum thawhna nasa tak karah mipui ten harsatna tam tak tawkin remna a awm theihna atan inbiakna kalpui a ni a, Kohhran te leh pawl hrang hrang, a bikin zirlai pawlte chuan remna leh muanna a awm theihna atan theihtawp an chhuah a. Hetianga beihna avang hian khatih lai-a Prime Minister Rajiv Gandhi leh MNF President Laldenga chuan remna an siam thei ta a. June ni 30, 1986 zan-ah Delhi-a Inremna thuthlung ziahna ah hian sawrkar laipui mi pawimawh te bakah Mizoram hruaitu engemaw zat an tel a. Inremna thuthlung-ah hian MNF aiawhin an President Laldenga bakah sawrkar laipui aiawhin khatih laia Union Home Secretary R. D. Pradhan leh Mizoram Chief Secretary Lalkhama te'n an hming an ziak bawk a. Remna ni hi kumtin urhsun taka hman a ni chho ta zel a ni.