MIGAHTA te la nuar; Zirlai pawl ten inrem an duh

Sawrkar laka thilphut nei-a lungawi lohna lantir mek Mizoram Govt. Adhoc Aided High School Teachers’ Association (MIGAHTA) chuan nimin khan Aizawl-ah an thilphut lantirin Peaceful Sit-in Demonstration an nei.

MIGAHTA hian an thilphut nawr nana Bagde dum bel-a a huho-a chawlh te an lak hnuah nimin khan Aizawl-a Vanpa Hall kawt-ah an thilphut nawr nan Peaceful Sit-in Demonstration an nei a, he hunah hian MIGAHTA President F. Vanlalchhuanga chuan tunhma zawnga Sawrkar in school provincialisation a kalpui danah thingtlang leh khawpui School te enrollment hmangin khirh takin a teh ngai lo tih sawiin, khawtlang in an mamawh avang zawk-a provincialised mai thin a nih thu a sawi a. Heng School sawrkarin a lo provincialise tawh te-ah hian khaw te reuh te te, mipui pawh tlem te, zirlai pawh tlem te lo awm tawh thinna an nih thu sawiin, hetianga tehna an hman thin hmang hian sawrkar chu Provincialise pe ve ngei turin an ngen tlat thu a sawi bawk.

MIGAHTA ten an School provincialised tura nawr nana lungawi lohna an lantir mekah zirlaite zirna ah nghawng thalo a neih theih avangin MZP chuan Palai hna thawkin nimin khan Education Minister, Dr. Vanlalthlana chu a Pisa-ah an hmu a, hemi hnu nimin vek khan Adviser to CM (Political) Lalmuanpuia Punte pawh hmuin an thilphut hi an sawipui bawk. MZP chuan MIGAHTA leh Sawrkar lam chu an inbiak fel vat theih an beisei thu an sawi a ni.

Hetihlai hian MSU pawhin he nawrhna kal mekah hian Zirlaiten an zirna an dawn mumal loh a hlauhawm avang Sawrkar nena inbiakremna nei thuai se an duh thu an sawi bawk a ni.