Sawhthing leina atanga sum hmuh sawrkar-ah hlan
Nimin khan Mizoram Agricultural Marketing Board (MAMB) hi MAMB Committee Room-ah an Chairman leh Agriculture & Farmers' Welfare Minister, PC. Vanlalruata kaihhruaina hnuaiah an thukhawm a, he thutkhawm ah hian Agriculture Minister chuan MAMB aiawhin State sawrkar hnenah Central Scheme MIS (Market Intervention Scheme) hnuaia pawisa an dawn, Rs. 9,48,14,281 chu a hlan a. State sawrkar aiawhin Finance Department changtu Secretary, Ramchuana chuan a lo dawng a. Finance Department chuan State sawrkar account-ah he sum hi an khung ve leh dawn a ni.
Market Invention Scheme 2024-2025 hnuaiah hian MAMB chuan Ministry of Agriculture & Farmers' Welfare, Government of India atangin pawisa hi a dawng a; MIS Scheme hnuaiah hian sawrkarin kuthnathawktute atanga Sawhthing a leinaa hloh (net loss) a neih chu za zela 75 (75%) central sawrkar hian a rawn tum ve tur a ni a. Chutiang atan chuan Central sawrkar hian Rs. 9,48,14,281/- chu rawn tum vein, he pawisa hi MAMB chuan State sawrkar-ah a chhunglut leh a ni. Nimin-a thutkhawm ah hian MAMB Co-Chairman leh Adviser to CM (Handholding) Dr. KC Lalmalsawmzauva bakah Agriculture & Farmers' Welfare Department changtu Secretary Ramdinliani IAS; Horticulture Department changtu Secretary Maria CT Zuali IAS bakah Finance Department leh MAMB Member dang te an tel a ni.