MHIP Sub-Hqrs. Serchhip huamchhunga MHIP Branch ten uar takin MHIP Day an lawm
MHIP Day hi Serchhip-a MHIP Branch hrang hrangte chuan an remchan angin an hmang hlawm a, MHIP Sub-Hqrs. Serchhip President, Lalhmunsangi chuan Kanghmun South-a MHIP Day lawmna chu khuallian nia hmanpuiin hruaitu dang ten an tawiawm a, MHIP Sub-Hqrs. President chuan an hmalakna hrang hrang tarlangin, Mizo hmeichhia ten pasal atan mahni hnampui ngei an neih a pawimawh thu te, taksa lang tam lutuk thawmhnaw hak chu hmeichhia te tan a zahawm loh theih thu leh Mizo hmeichhiate inthuamna hlu tak Puan bih chu function pawimawh leh incheina atan Mizo hmeichhia ten an uar deuh deuh a pawimawh thu a sawi a. Hei bakah hian MHIP Member te chu dikna leh rinawmna nunpui tura chah bawkin, heng thil pahnih te hi inkawp tlat a nih avangin mihringte kan nunhona a thil pawimawh tak a nih thu te pawh a sawi bawk a ni.
Serchhip Chanmari Branch MHIP te chuan kumin hi an kum 25-na, Silver Jubilee kum a nih bawk avangin MHIP Day leh Silver Jubilee lawmna hi Zotawna Futsal Ground-ah an hmang a, he hunah hian hruaitu hlui te chawimawina hlanin Report hrang hrang ngaihthlak a nih bakah chawhnu lamah intihhlimna hun an hmang a, tlai lamah ruai an kilho nghal a ni.
Serchhip Kawnpui South Branch MHIP te chuan MHIP Day pual hian nimin zing khan Serchhip Bazar-ah a duh apiang te in theih tura thingpui chhawpin chhun lamah Dawngzawl-a District Park-ah MHIP Day hi lawmna an nei zui a, chawhma lamah Report hrang hrang te an ngaihthlak bakah chawhnu lamah intihhlimna neiin hun an hmang a, MHIP Day lawmna ruai an kilho nghal a ni.
Serchhip Kawnpui North Branch MHIP te chuan Serchhip Kawnpui North Branch YMA Library Hall-ah MHIP Day lawmna hun hmangin report hrang hrang ngaihthlak a nih bakah an member boral te sunna hun hman a ni a, chawhnu lamah intihhlimna hun hmangin tlai lamah ruai an kilho nghal bawk.
Hriat theih chinah MHIP Day hi Serchhip Dinthar Branch, Serchhip Hmar Veng Branch, Serchhip P&E Veng Branch, Serchhip Saron Branch. Serchhip Field Veng Branch, New Serchhip Venglai Branch, New Serchhip North Branch leh Bukpui Branch te chuan nileng-in a lawmna an nei a, Chhekhnai Branch chuan hnatlang-a hun hmangin Serchhip Chhim Veng Branch ten zingkar-ah hnatlang neiin hun an hmang thung a ni.
MHIP Sub-Hqrs. Serchhip huamchhungah hian Block pathum- Tawi Block, Ramlai Block leh East Lungdar Block te awmin Branch 84 a awm a, MHIP Member mi 4500 vel awmin Serchhip Town chhungah MHIP Branch 20 a awm bawk a ni.