Mamit District Hospital Building sak zawh a nih hnuah sawrkar kut-ah hlan a ni ta
Mizoram Sawrkar-a Health & Family Welfare Department chuan Mamit District Hospital Building sak thgar inhlanchhawnna hun hi Health Minister, Lalrinpuii Pisa-ah nimin khan an buatsaih a, he hunah hian Zamzo Engineering Construction & Consultancy neitu Ronnie Zolianngura chuan Mamit Hospital an sak dan report tawi a pek zawh hnuin Mamit Hospital sak zawh tak chu Mizoram sawrkar hnenah a hlan nghal a ni.
Mamit-a District Hospital Building hi Power Finance Corporation Ltd. (PFC), New Delhi te CSR Fund leh Mizoram sawrkar atangin 70:30 a inchawisema kalpui niin he project atan hian cheng vbc. 17.934 sen a ni a. Mamit Hospital Building sak thar hi Chhawng 5 a sang niin, a zau zawng hi 4,240.78 sqm a ni. Damdawi In building sa tur hian March 6, 2020 khan inremna ziah a ni a, inremna ah hian Mizoram sawrkar aiawhin khatih laia Health Secretary H. Lalengmawia leh Power Finance Corporation atangin Praveen Kumar Singh, Director (Commercial) ten an hming an ziak a. COVID-19 hripui leh lockdown avang te leh building design siam danglam ngaihna avang te in project hunbi chu tlai deuh mah se, hna chu zawhfel tawh niin Completion Certificate pawh May ni 2, 2025 khan pekchhuah a ni tawh a ni.
He Project hian Hospital-a khum 30 awm tawh atangin khum 100 nei IPD Block thar siam a ni a. Hei hian Mamit District a mipuite tana quality tha zawka Secondary Healthcare Service pekna te, nu leh nau enkawlna te, Emergency Service te, Operation Theatre te, Laboratory te, Imaging leh Medical Service hrang hrangte pawh changtlung takin a buatsaih sak a ni. Hospital thar hian District mipuite tana damdawi leh inenkawlna awlsam zawk a siam dawn a, Tertiary Hospital-ah Referral ngaihna a tihniam bawk ang.
Mamit Hospital building sak thar inhlanna hunah hian Health Minister Lalrinpuii chuan Ministry hmasa lamah Hospital neihna turin MoA sign a nih thu sawiin, Power Finance Corporation Ltd. (PFC), New Delhi te CSR Fund hmanga he project hi kalpui a nih thu a sawi a, kum hmasa lamah sum an dawn kim loh avanga Hospital chu sak zawh a nih loh thu leh inhlanchhawn a rem loh thu a sawi a. Mamit Hospital IPD Block chu sak zawh tawh a nih thu sawiin, inhlanchhawnna hun an nei thei te chu lawmawm a tih thu a sawi bawk. He hunah hian Health & Family Welfare Department Official te an tel bawk a ni.