Lunglei Police ten phone 64 an hlan let tawh

Lunglei District Police Cyber Cell te chuan kumin 2026 kum chanve (January ni 1 atanga June ni 30 inkar) chhunga Mobile Phone bo report an dawn zinga an chhuichhuah phone 64 chu a neitute kutah an hlan let tawh a, Phone bo an hmuhlet zawng zawng hi a hun lai zela a hlut zawng chu cheng nuai 10.73 (Rs. 10,73,032/-) vel a ni. Lunglei District Superintendent of Police J. Lalmuankima chuan phone bo report an dawn te chu Cyber Cell te'n ngawrh taka chhui zuiin, an phone hmuhlet te a neitute kuta an hlanlet nghal bakah phone bo chungchanga dan bawhchhia man chhuahte chu thubuai siamsak thin an nih thu a sawi a. Phone bo a man phu lova hniama lo leisaktute pawh dan anga thubuai siamsak thin an nih thu sawiin, phone hlui (secondhand) lei kawngah mi tinte fimkhur tur leh hriatchian loh chu lei lo tur te, Phone hlui zuar rinhlelhawm an awm chuan a rang lama Police te hriattir thuai thin tur te'n mipuite a chah a ni.