Lunglei District-ah mi 21,549 te SIR-ah Hearing notice pek an ni

Lunglei District-a mi 21,549-te chu Electoral Roll siamthat hna kalpui mekah ‘Hearing’ a kal turin tih an ni.
Nimin khan Lunglei-ah District Election Officer, Navneet Mann-i hovin Special Intensive Revision (SIR) 2026 hnuaia Draft Electoral Roll ennawn leh a kaihhnawih hmalakna hrang hrangte thlirho a ni a, he hunah hian District Election Officer chuan  SIR hmalakna chu vote nei thei dik takte Electoral Roll-a thun an nih theih nan leh vote nei thei lo te paih an nih theihna tura kalpui a nih thu sawiin, Draft Electoral Roll-ah Lunglei District-a Assembly Constituency (AC) paruk ah vote nei thei mi 98,808 an awm thu leh chung zinga enfiah ngai mi 21,549-te hnenah hearing notice pek a nih tawh thu a sawi a. Heng enfiah ngaite hi kum 2005 SIR Electoral Roll-a zawmpui nei lo (No Mapping) te, zawmpui nei, an inziah dana felhhlel awm (mapping with discrepancies) leh Electoral Registration Officer (ERO)-te'n rinhlelhawm leh enfiah ngaia an ngaihte an nih thu a sawi.

Hearing notice pek tamna ber chu 35-West Tuipui AC niin mi 7,484 pek an ni a 34-Thorang AC-a mi 4,388 hnenah notice pek a ni tawh bawk a. AC dangah pawh mi engemaw zat notice pek niin Electoral Roll-a hming chuangte hi uluk taka enfiah mek a ni a. ERO leh AERO-te chuan khaw hrang hrangah hearing notice pekte insawi fiahna hun buatsaih chho mekin, Electoral Roll dik leh felfai tak a awm theih nan Notice dawngtute chu hun bi ruatah an dinhmun tihchianna lehkha pawimawh (document) pawm chin kenga inlan theuh turin DEO chuan a ngen a ni.