Lunglei-ah ‘LESDE Job Fair & Career Fair 2026’ buatsaih a ni

Zonuna Kawlni (LENKAWL) • July 22, 2026 • Comments • Mizoram

Nimin khan Lunglei-ah hna zawngtute leh hnathawk ruaitute intawhkhawmna Kutpui, ‘LESDE Job Fair & Career Fair 2026’ neih a ni.

Labour, Employment, Skill Development & Entrepreneurship (LESDE) Department Lunglei leh Govet. J. Buana College (GJBC) tangkawp ten Ministry of Labour and Employment Govt. of India hnuaia National Career Service Project (NCSP) kaltlanga Model Career Centre Scheme atanga an buatsaih ‘LESDE Job Fair & Career Fair 2026’ hi GJBC Multipurpose Hall-ah neih niin Lunglei Bawrhsap Navneet Mann-i chuan a hmanpui a, Lunglei thalaite'n District leh State hmasawnna atan tih theih tam tak an neih thu sawiin, mahni intodelh tur leh chhungkua leh khawtlang tana mi tangkai ni turin eizawnna ngelnghet neih a pawimawh thu a sawi a. Sawrkar hna chu hna nghet leh him ni mah se, tunlai khawvelah eizawnna kawng awmchhun a nih tawh loh thu a sawi a, sawrkar hna chauh thlir lova, sumdawnna leh mahni thiam thil hmanga eizawnna remchang awm hrang hrangte chhawr tangkai turin a chah bawk.

LESDE Job Fair-ah hian hnathawk ruaitu pawl/sumdawng hrang hrangte telin dawr 27 siam a ni a. Heng Sector- Financial Institution, Banking, Healthcare, Service, Automobile, IT, FMCE, Tourism & Hospitality, Beauty & Wellness, etc. hnuaia company hrang hrang inpho chhuakin, Mizo thalai hna zawng laite tan hna thawh tur an chhawpchhuak a. Thalai hna hmu nghalte an awm bakah, employer-te hnena inziaklut, Interview leh Cocument endik hmabak (follow up tur) mi thahnem tak an awm bawk a. Zirna leh eizawnna kawng inkawhhmuhna (career guidance leh counselling) buatsaih a ni bawk.

LESDE Department hi Mizoram sawrkar hnuaia thalaite tha tihchakna (youth empowerment) lama hma latu a ni a. thalaite eizawnna tlak thiamna pek (skill training) kawnga hma an lak bakah, intihsiakna leh intawhkhawmna hrang hrang – Skill Competition, Innovation leh Entrepreneurship Fair leh Competition te an buatsaih thin a. He hunah hian Lunglei DLEO Lalbiakmuana Hauhnar chuan LESDE Job Fair buatsaih chhan ber chu thalai hna zawng mekte leh hna thawk ruaitute awlsam zawka an intawhkhawm theihna tur a nih thu a sawi bawk a ni.