Laldenga thihchampha hmang

Nimin July 7, 2026 kha MNF Founder President Laldenga thihchampha vawi 36-na niin Aizawl Treasury-a a Thlan-ah MNF President Zoramthanga hovin MNF hruaitute leh Laldenga chhungte chuan zahna pangpar dahin sunna hun hman a ni.
MNF Founder President Thlan-a hun hman ah hian MNF President Zoramthanga chuan inremna hlawhtling ber leh ram zalen ber min hlawhchhuah puitu, Hnam hmangaihna chi Zofate thinlunga tuhtu, Laldenga chu hriatreng a phu tih sawiin, “A thihcham a lo thlen hian zahna chibai kan buk nawn leh a ni. Hnamdang ten Pu Laldenga hova remna hlawhtling kan nei thei hi an awt a, vannei min ti hle a ni. Hetianga inremna tha kan nei thei hi ropui min tihpui a, sawi nuam an ti hle. Thangthar ten zalenna kan neih hi kan vawnghim zel tur a ni,” a ti bawk.

He hunah hian Laldenga fanu leh MNF General Hqrs. a General Secretary Dr. Reenee Lalrinzuali pawhin Pathian ringtute tan Amah Pathian leh kan ram neihchhun tana ke kan pen chu a inhmeh hle tih sawiin, “MNF in kan thupui-a ‘Pathian leh kan ram tan’ kan tih hi kan zavaia kan thupui lo nise a tha hle ang. Kan nun min kaihruaitu leh kan ram tan thil pawimawh tak a ni reng dawn a ni. Hnam tana nunna hlantu zawng zawngte an zahawm takzet a, zahna ka hlan a ni,” a ti bawk.

MNF Founder President Laldenga hi July 11, 1927 khan Lunglei Pukpui khuaah a piang a, kum 1944-ah British Indian Army zawmin kum 1959-ah Mizo National Famine Front chu a hova din niin October 22, 1961-ah Mizo National Front (MNF) tiin thlak a ni a. March ni 1, 1966-ah zalenna sual tanin kum 20 chhung zalenna an sual hnuin June 30, 1986-ah inremna an ziak a. Mizoram State puitling-a puan a nih hnuah Chief Minister hmasa ber niin July 7, 1990 khan Memorial Sloan Keterring Cancer Centre New York, USA-ah a boral a, July 13, 2990-ah vuiliam a ni.