Khawzawl District-a Tel tharchhuah thawnchhuah a ni
Khawzawl District Agriculture Office tual-a hemi puala hun hman ah Bawrhsap K. Vanlalthiana chuan Nihawi chin leh a Tel herchhuah kawnga Khawzawl District Agriculture Office, Khawzawl KVK leh Loneitute thawhrimna chu fakawm a tih thu sawiin, Sawrkar hotute leh loneitute chu inhnaih leh inpawh taka hna an thawk thei chu lawmawm a tih thu a sawi a. “Tunlai khawvel thiamna a sang zela, Smart TV leh Smart Phone kan hmang ang hian kan eizawnna leh kan hnathawh danah pawh Smart a ngai,” tiin, “Khawvel thiamna leh finna hian min kalsan chuan kan dingchang thei dawn lo,” a ti a. Loneitute chu thla hnih thum chhung lek pawh an Lo dah awl mai lova, thil engemaw tal tharchhuah tum turin a fuih a. Loneitu 120 laiin ngaihtuahna thar leh smart tak neia Nihawi chinga a Tel an herchhuak thei chu lawmawm a tih thu sawiin, Khawzawl District an chawimawi tak meuh meuh a ni, a ti a. An Tel herchhuah chu an sum lakluh zat atang chauha a hlutna teh lovin, ngaihtuahna thar an neihna leh Tel tha leh hrisel zawk an herchhuak chu a hlutna dik tak a nih thu a sawi a, kumin hun lo kal zel turah pawh hei aia tam zawk leh tha zawk tharchhuak turin duhsakna a hlan bawk.
He hunah hian Khawzawl-a District Agriculture Officer (DAO) Lallawmzuali chuan India ramah kan ei leh in atana kan hman ‘Edible Oil’ zinga 60% chu ram pawn atanga lakluh a nih thu leh Tel-ah hian kan intodelh a pawimawh thu a sawi a. Tel-a kan intodelh theihna turin Sawrkar chuan NMEO-Oilseeds Mission kalpui mekin, nikum lamah Khawzawl District pawhin he Mission hnuaiah hian Nihawi chin nasa takin a kalpui a, amaherawhchu nikum lamah ruahsur mumal lo, Pawldelh ruah a sur leh avangin beisei ang tak an thar phak loh thu a sawi a. Nihawi tel hi a hrisel bik em em tih pawh sawiin, BP sang tan a that bakah Zunthlum neite tan pawh a hlauhawm loh bik a, Vitamin E leh Thau tha (good cholesterol) a tipung bawk a, Vitamin E, A leh D-a pai tam avangin vun a ti nung a, taksa a natna do theihna a tihchak thu te a sawi bawk.
He huna tarlan a nih danin NMEO-OS leh RAD scheme hnuaiah kum 2025-26 chhung khan Khawzawl District-ah Nihawi (Variety KBSH 90) chin a ni a. Nihawi hi Zau (Cluster) 6 - Rabung, Sialhawk, Biate, Khawzawl, Khawhai leh Kawlkulh-ah te loneitu 120 in Tin 98 hmunah an ching a, DAO hmalaknain Tel herna khawl ngaihtuah niin khawl hi Khawzawl, Rabung leh Sialhawk-ah te bun a ni a, Tel litre 2000 herchhuah a ni a, purity (firna) chu 99.9% niin a thar tam ber Khawlnunpuia, Biate chuan litre 237 a tharchhuak a ni.