Hmarchhak Bial chu hmun hla leh kalpawh harsa a ni tawh lo tih Larsap in a sawi
Indian Telecommunications Service (ITS) Probationary Officers, 2023 Batch te chuan ‘North East Study Visit’ neia Mizoram tlawh mekin nimin khan Mizoram Larsap, General (Dr) Vijay Kumar Singh chu a chenna, Lok Bhavan-ah an kawm a. He hunah hian Larsap General (Dr) Vijay Kumar Singh chuan ITS Officer tharte chu nakin lawka India ram Telecom Sector innghahna ni mai tur leh policy duang tur mi pawimawh tak tak an nih thu sawiin, India hmarchhak State dinhmun zirchiang tura an rawn tlawh chu lawmawm a tih thu a sawi a. Hmarchhak State chu tunhma pawn lama ngaihdan - hmun hla, kalpawh harsa leh nunphung dang hlak ang kha a nih tawh loh thu sawiin, Sawrkar laipui Act East Policy hmangin hmasawnna ruhrel nasa tak siam a ni tih a sawi a. Kalpawh awlsam, inbiakpawhna tha, digitisation leh Data Highway lama hmasawnna nasa tak nei a nih thu sawiin, India ram hmun dangte ang bawka hmasawnna a thlen thu a sawi bawk.
Larsap chuan Act East Policy hnuaia hmalakna pawimawh tak, Kaladan Multi-Modal Transit Transport Project chu danglamna leh hmasawnna hrang hrang thlentu tur a nih dawn thu sawiin, zawhfel a nih hunah Telecom Sector-in hmalakna tam tak a neih dawn avangin Officer-te chu lo inpuahchah lawk turin a chah a. Act East Police hnuaiah hmarchhak State-in sumdawnna, khualhip, inkalpawhna leh inbiakpawhna bakah hmasawnna hrang hrang a hmuh belh zel dawn thu a sawi a. Digital economy-ah Telecom Sector a pawimawh zual deuh deuh dawn tih sawiin, mipuite inbiak-pawhna tha hluitu leh hmarchhak Bial-a hmasawnna thlentu pawimawh an nih thu a sawi a. Mizoram chu ram chhung hmun pawimawh taka awm a nih avangin inbiakpawhna tha a awm theih nana theihtawp chhuah turin Telecom hotute a chah a ni.
Mizoram tlawhtu ITS Probationay Officer 5-te hi Dr. SK Samanta, ITS, Deputy Director General, SC Unit Mizoram bakah Department of Telecommunications, Govt. of India official dangten an rawn tawiawm a. ITS Probationary Officer-te hian hmarchhak State-a inbiakpawhna leh hemi kaihhnawih hmasawnna ruhrel tha a awm theih dan turte, harsatna awm theite leh a chinfel theih dan turte an rawn zirchiang a ni.