Siaha leh Champhai-ah Job Fair 2026 buatsaih a ni

Nimin khan Govt. Saiha College leh Govt. Champhai College-ah ‘Job Fair 2026’ neih a ni a, Company/Institution hrang hrang ten dawr an hawng a ni.

Labour Employment, Skill Development & Entrepreneurship (LESDE) Department, Siaha leh Govt. Saiha College Siaha te tangkawp buatsaihin nimin khan Govt. Siaha College Seminar Hall-ah ‘Job Fair 2026’ neih niin Siaha Addl. DC Abraham Beirazi Khithie chuan hawngin tunlai khawvel ah hna a vang tawh em em a. Chutiang a nih laia hnathawk ruaitu (job providers) ten an awm hmun ngeia an rawn kalchilh chu a vanneih-thlak hle tih sawiin, chutiang hun tha chu hmang tangkaia, ngaihtuahna fim tak nen hmalam hun atan hna tha tak an hmuh theihna tura inbuatsaih nan hmang turin he huna tel te chu a chah a ni.

He Job Fair hi Ministry of Labour & Employment hnuaia National Career Service project atanga buatsaih a ni a, Hna thawh tur nei (job providers) leh hna zawng mek (job seekers) te thlun-zawmtu niin Job Fair/Career Fair-ah hian Company/Institution hrang hrang 15 ten Stall an hawng a ni.

Nimin vek khan Champhai-ah pawh LESDE Department leh Govt. Champhai College te tangkawp buatsaihin Govt. Champhai College-ah ‘LESDE Job Fair’ neih a ni a, he hun hi Champhai North Bialtu MLA leh Adviser to Chief Minister (Technical) Er. H. Ginzalala chuan khuallian nia hmanpuiin thalaite chu sawrkar leh mi dangte hnena hna zawngtu chauh ni lo tura fuihin, mahni pual leh mi dangte tana hnaruak siamsaktu nih chu tunlai khavelah thil pawimawh tak pakhat a nih thu a sawi a. Entrepreneurship chu ram hmasawnna chak taka kalpuitu leh thalai tam tak tana hnaruak siamsaktu a ni tih a sawi bawk. He Job Fair-ah hian Stall 22 hawn a ni a, a hmuna hna hmu nghal bakah, hnaruak diltu, interview leh document endik hmabak te an awm a ni.