FCRA chu Kristiante thlur-bingna a ni lo tih sawi

Catholic Bishop's Conference of India (CBCI)-in Foreign Contribution Regulation Act (FCRA) chungchanga Union Home Minister Amit Shah an hmuhna ah Union Home Minister chuan FCRA chu Kristiante thlurbingna a nilo tih a sawi.
India rama Catholic Kohhran thuneitu sang, CBCI chuan Zirtawpni khan Union Home Minister hnenah Sakhaw Zalenna leh Manipur buaina chungchangah Memorandum thehlutin, Union Home Minister chuan FCRA chungchang chu Kristian bik thlur-binga a ni lo tih lo hrilhin, kum kaltaah FCRA hmanga cheng vbc. 17,000 bawr hmuh atangin vbc. 3000 bawr vel chu Kristian Organisation tan a nih thu a sawi a; Kum 2010-a Bill siam tawh chu Anti National Activities atana hman a nih loh nan te, a nihna tur ang taka hman a nih theih nan te he Dan hi siamthat tum a nih thu a sawi bawk a. Kohhran leh a hnuaia hmalakna peng hrang hrang bakah Sakhaw dang he Foreign Contribution hmang tangkaitu emaw, eng pawl emaw pawh bitum bik an awm lo tih a sawi.

Union Home Minister chuan CBCI in FCRA Bill hnukkir tura an ngenna chu tun Parliament Fur thutkhawm lo awm turah sawiho tura chhawpchhuah tum a nih thu a sawi a. Foreign Contribution kaltlanga hmasawnna ruhrel leh thil dang dang din tawhte Sawrkar laipuiin chhuh sak a tumna lam a nih loh thu a sawi bawk.

Union Home Minister chuan, Kristiante nekchepna reng rengah FIR thehluh thin nise, ngaihsak loh, hmalakna awm lo leh duhkhawp lohna a awm a nih chuan Ministry of Home Affairs-ah thlen a, mimal taka a lo bawhzui thin dawn thu sawiin; Kristian pawl hrang hrangte FCRA avanga an sum hmuhna tihtawp sak leh harsatna an tawh zawng zawng lakhawm a, ziaka a hnena thehlut turin a ngen a, Ministry of Home Affairs in lo enzui a, bawhzui a tiam bawk a ni.