ERO leh AERO te an hna ah fimkhur turin chah

Mizoram puma Electoral Registration Officer (ERO) leh Assistant Electoral Registration Officer (AERO) te pualin nimin khan Special Intensive Revision (SIR) 2026-a hming paih, inthunthar leh siamthat hun (claims and objection period)-a an mawhphurhna chipchiar taka zirhona hun buatsaih a ni.

Mizoram CEO Office buatsaih-a Training hi Aizawl a I&PR Conference Hall, Lianchhiari Run-ah neih niin Joint CEO Ethel Rothangpuii chuan a kaihruai a, chawhma lamah Champhai, Lunglei, Lawngtlai, Serchhip, Mamit leh Saitual District ten hun hmangin Chawhnu lamah Aizawl, Kolasib, Hnahthial, Siaha leh Khawzawl District huamchhunga ERO leh AERO ten Training an nei ve leh a, State Level Master Trainer Lalnunfela Chawngthu leh Timothy T Lalhmangaiha ten zirtirna pein Zawhna leh chhanna bakah sawihona hun an hmang nghal a ni.

He hunah hian Joint CEO Ethel Rothangpuii chuan Special Intensive Revision pawimawhzia sawiin, “Ram leh hnam khawih thil a ni a, theihtawp kan chhuah a ngai,” a ti a. Enumeration Phase a zo a, Draft Electoral Roll hlawhtling taka tarchhuah a ni tawh a; tunah chuan Claims and Objection Period ah an awm mek thu leh he hunah hian ERO leh AERO te tihtur pawimawhzia a sawi a. SIR 2026 Final Electoral Roll tarchhuah a nih hunah vote nei thei zawng zawng Electoral Roll-a an chuan theihna tur leh vote nei thei lo te he Roll-ah hian an hming a lan ve lohna tura theihtawp chhuah a tul thu a sawi a. Final Electoral Roll-ah hian hming lang lo tur an lo lang a nih chuan anmahni mai bakah an tuchhuante thlengin India khua leh tui, vote nei thei nihna an neih tawh dawn avangin ERO leh AERO ten ram leh hnam hmangaihna thinlung puin, fimkhur takin hna an thawk tur an nih thu a sawi bawk.