DM&R Minister in sawrkar laipui-ah mamawh a thlen

New Delhi-a cham mek Disaster Management & Rehabilitation Minister Prof. Lalnilawma chuan sawrkar laipui-a Project a lo thehluh tawh te bawhzuiin hmalakna thar turte a thlen nghal bawk.

African Swine Fever vanga Mizorama Vawk vulhtute harsatna ah ASF chu State Disaster Relief Fund hnuaia Notified Disaster a puan nise, State Disaster Management Authority chuan Notified Disaster-a puan ni se tih lo pawmpui tawhin National Disaster Management Authority-ah rawtna thehluh a lo ni tawh a. ASF avangin cheng vbc. 485.37 zet vawk vulhtu ten an chan nia chhutin, zangnadawmna sang zawk an dawn theih nan DM&R changtu Minister Prof. Lalnilawma hian thuneitute chu nimin khan a dawr a. Hei bakah hian Lawngtlai Bazar Veng leh Chandmary-a leimin vanga chhiatna thleng chungchangah Central Special Assistance atanga tanpuina cheng vbc. 21 dilna te; Aizawl, Lunglei, Serchhip, Champhai leh Siaha District tan National Earthquake Risk Mitigation Programme (NERMP) Phase-I ah cheng vbc. 95.76 dilna te; National Landslide Risk Mitigation Programme (NLRMP) Phase-I hnuaia Ngaizel, Serchhip, Champhai leh Siaha a leimin chung-changah cheng vbc. 50 Final Project Proposal Report te a umzui nghal bawk a ni.

Hei bakah hian Home Affairs Ministry-ah Post Disaster Needs Assessment (PDNA) Report 2021–2025 chu thehlutin he report-ah hian kum 2021–2025 chhunga Mizorama chhiatna chi hrang hrang thleng - Cyclone Remal, ruahsur nasa avanga tuilian leh leimin, Mautam avanga Sazu puangin buh leh bal nasa taka a tihchhiat te leh ASF avanga harsatna thleng ten mi tam tak eizawnna a tihchhiat dan leh inkalpawhna engemawzat siam that ngai a awm thu tarlan a ni a. Chhiatna thleng hi cheng vbc. 644.71 hu vel nia chhut a ni a. Economic loss belhkhawm hi cheng vbc. 645.49 vel niin, a pumpuia zangnadawmna leh siamthat hna thawh nan cheng vbc. 873.22 mamawh a nih thu tarlan a ni.