Kum 2026-2027 chhungin Mizoram in FASPHI atangin cheng vbc. 120 a dawng dawn - Chief Minister
Chief Minister Lalduhoma hian nimin khan Falkawn-a Zoram Medical College & Hospital (ZMC&H) tlawhin 16th Finance Commission hun chhungin sawrkar laipui chuan ‘Financial Assistance to States/UTs for Public Health Infrastructure’ (FASPHI) Scheme a kalpui dawn thu leh kum 2026-27 chhung atan cheng vbc. 4200 dah hran atangin Mizoram chuan cheng vbc. 120 kan hmuh dawn thu a sawi a. He Scheme-ah hian Indicator pal (4) – Infant Mortality Rate (IMR); Maternal Mortality Ratio (MMR); Tuberculosis Mortality Rate (TB-MR) leh Damdawi In (Sub-Centre te tiamin) National Quality Assurance Standards (NQAS) Certify zat te hmanga State hrang hrang ten an dawn tur hi chhut a ni tih sawiin, “Mizoram-in lawmman (incentive) kan dawnna Indicators te chu IMR leh NQAS Certified damdawi In neih tam (percentage of Health Facilities that are NQAS certified) te an ni a. IMR hi kum 2023-ah 13 (naupiang 1000 zela 13 thi) niin kum 2024-ah 12 a tlakhniam avangin cheng vbc. 20 incentive dawn a ni,” a ti a. NQAS Certified damdawi In te hi kum 2024-25 atanga 2025-26 a a punna chu 21.07% a nih avangin cheng vbc. 100 chu incentive dawn a nih thu leh hei hi a dawn theih sang ber a nih thu pawh Chief Minister chuan a sawi bawk a. “Ministry of Health & Family Welfare (MoHFW) atangin kan claim tur zat hi min rawn hrilh tawh a. cheng vbc, 120.00 man hu project proposal thehluh tawh niin MoHFW hian min pawmsak tawh a ni. MoHFW hian July thla ralhmain proposal-te hi Ministry of Finance-ah a thehlut dawn a ni,” a ti bawk.
He Scheme atanga Mizoram-a hnathawh tur project approve tawhte pawh Chief Minister chuan sawiin, “Hnathawh that vanga lawmman (incentive) kan dawng thin hi a lawmawm a, hmalakna tur dik taka kut kan thlak thinzia tilangtu a ni a, a chhuanawm a ni,” tiin Health Minister Lalrinpuii leh H&FW Department-a a thawktute chungah lawmthu a sawi bawk a. He sum hmanga hnathawh tur hrang hrang ruahman te tarlangin, Sakawrdai, Kawrthah, West Phaileng leh Bung-tlang South CHC te tih changtlun tur niin Lunglei leh Lawngtlai District Hospital-ah Infectious Diseases Ward siamin Kulikawn Hospital-ah Infectious Diseases Ward & Tuberculosis Treatment Unit din turte bakah thildang pawimawh te a tel bawk a ni.
ZMC&H-ah hian tunah dinhmunah zirlai 494 an awm mek a, Intern ti lai 97 an awm a. Kum 2025 - 26 Academic Year bikah MBBS zirlai 100 a nei a, an zinga 70 hi State Quota a ni a, a dang 15 chu All India Quota niin a dang 15 te chu Non-Resident Indian quota a ni a. National Medical Commission chuan Post Graduate zirna seat 10 a rawn phalsak tawh bawk a ni.
Hei bakah hian Master of Public Health zirna chu kum 2024 khan an hawng tawh bawk a, tunah hian zirlai 8 an awm mek bawk a ni.
ZMC&H-ah hian MCON, RIPANS leh Pharmacy College hrang hrang atangin Nurse leh Laboratory Technician zirlaiten Internship leh Clinical Posting Programme an nei reng thin a. Department pariat: Blood Bank, Accident & Emergency, General Administration, Labour Room, Maternity OT, Paediatrics OPD, Paediatrics Ward leh SNCU ten NQAS National Certificate an hmu tawh a ni.
Tun kum hnih leh a chanve chhungin Cabin pawh a thar 30 siam belh niin Cabin hi a vaiin khum 40 a awm tawh a. ICU pawh hi hemi hun chhung vek hian a thar 13 siam belh niin a vaiin ICU hi 26 a awm a. ZMC&H-ah hian kum 519 awm mekin Mizoram-a Hospital lian ber a ni.