Digitization-ah fimkhur ngaihna tam tak a awm thu ICT Minister in a sawi

Information & Communication Technology (ICT) Department changtu Minister Dr. Vanlalthlana chuan mipuite himna tura an privacy vawnhim sak, an hamthatna tur ngaihtuah leh rinngam nih chu sawrkar tihtur pawimawh tak zinga pakhat a ni tih sawiin, Digitization-ah fimkhur ngaihna tam tak a awm thu a sawi bawk.

ICT Department buatsaih ni khat awh ‘State-Level Workshop on Strengthening Cyber Security Frameworks for State Data’ chu nimin khan Aijal Club Mc Cable Hall-ah neih niin he hunah hian ICT Minister. Dr. Vanlalthlana chuan mipuite himna tura an privacy vawinhim sak, an hamthatna tur ngaihtuah leh rinngam nih chu sawrkar tihtur pawimawh tak zinga pakhat a ni tih a sawi a, “Tunah hian sawrkar chuan mipuite Digital data tam tak kawlin a kutah a awm mek a; mimal identity kaihhnawih te, Land Record emaw, Welfare benefits te pawh sawrkar hian a vawng mek,” tiin Digitization chu sawrkar hmanraw tangkai tak a nih rualin fimkhur ngaihna tam tak a awm thu a sawi a, mipui ten digital governance-ah rinna an nghah theih nan an data-te him taka enkawl sak a ngaih thu a sawi a. Data enkawl kawngah digital entry point te khauh taka vawnhim a, sensitive data zawng zawng mi dangin an hmuh theih lohna tura khuahkhirh (encrypt) vek a nih theihna tura tunlai thiamna kan hman a ngaih thu sawiin, Automated Monitoring System-te pawh hman tangkai a, minute reilote chhung pawha Security System-a thil pawi awmte hmachhawn vat thin a tul thu a sawi bawk.

He hunah hian ICT Chief Informatics Officer James Lalnunmawia chuan inlawmna thu sawiin, Mizoram-in digital transformation-ah nasa takin hma a sawn thu leh Paper-based file atanga e-office system hman mek a nih thu a sawi a, technology lama hmasawnna avangin mipui service pawimawh tam tak mipuite hnenah rang takin a thlen mek thu a sawi bawk.

He Workshop hi Ministry of Electronics & Information Technology (MeitY) leh National e-Governance Division (NeGD), Govt. of India hnuaia ram pum huap hmalakna pakhat niin thupui hrang hrang paruk (6) zirhona neiin sawihona tha tak neih a ni a, ICT Secretary Dr. YLN Reddy IAS pawhin he hunah hian thu sawiin, Mizoram Sawrkar hnuaia department hrang hrang aiawh Official thahnem tak an tel a ni.