Conference of the Central Council of Health & Family Welfare-ah Mizoram hmalakna tarlang

Health Minister Lalrinpuii chu nimin khan Central Council Health & Family Welfare Conference-ah telin hriselna kawnga Mizoram sawrkar hmalakna hrang hrangte a tarlang.

New Delhi Vigyan Bhawan-a 16th Conference of the Central Council Health & Family Welfare-ah hian Health Minister Lalrinpuii chuan Mizoram-in Sustainable Development Goals tihlawhtling tura a hmalakna kalzelah Neonatal Mortality rate leh kum 5 hnuailam Mortality Rate pawh 9 leh 18 ve ve-ah kan tlakthlak tawh thu te, Immunisation coverage pawh State data ang chuan 90% lai kan nih thu te, Non-Communicable Disease chungchangah nasa taka inzirtirna leh damdawi semna kalpui a nih thu te, TB rinhlelhawm te X-Ray hmanga endik tam lamah pawh India ram pum huapa titha ber kan nih dan te, Quality service pekchhuahna tur kawngah pawh State chhunga Health facilities 121 laiin NQAS Certification an neih tawh thu te sawiin, Niti Ayog in tehna hrang hrang a siam hmanga Aspirational District te a endikna ah Health & Nutrition Sector-ah Mamit District chuan India ram puma titha pathumna a hauh thu te a sawi a. Heng bakah hian Health Facilities zawng zawngah Ayushman Bharat Digital Mission hmalakna kalpui a niin Urban Wellness Centre zawng zawngah Esushrut Clinic System hman vek a nih thute te sawiin, Mi rethei zawkte tan chauha Central Sawrkar siam AB-PMJAY chu convergence hlawhtling taka kalpuiin, Mizoram mipui zawng zawng huapa State Sawrkar in MUHCS hlawhtling taka a kalpui chhoh dan a tarlang bawk a ni.

He hunah hian Union Health Minister JP Nadda pawhin tunhma lama damlo enkawlna - Curative lam chauh ngaih pawimawh thin chu Preventive, Curative , Promotion, Palliative leh Rehabilitative lam kawnga Sawrkarin ke a pen tawh thu a sawi a. India ram chuan independence a hmuh atanga kum 100 na, kum 2047-ah chuan Developed Country a nih theihna turin Vikshit Bharat 2047 goal pawimawh tak siamin, he goal hi mipui hriselte tello chuan tihhlawhtlin theih anih loh avangin mipuite hriselna chu Sawrkar chuan a ngaih pawimawh berte zing ami a nih reng tur thu a sawi bawk.

Conference of the Central Council of Health & Family Welfare hi Union Health Minister kaihhruaina hnuaia State hrang hrang Health Minister te telna Council niin, Health lama India ram pum huap Council sang ber a ni a, India ram pum huapa hriselna lama hmalakna hrang hrangte thlirho niin, hmasawnna tur kawng hrang hrangte an rel ho thin a ni bawk. He Council Meeting rual hian hriselna lama hmalakna atana tangkai hrang hrang te chu tlangzarh nghal a ni bawk.