CM Rubber Mission sawifiah

Land Resources, Soil & Water Conservation Department Director Vanlalmuanpuia Chhangte chuan nimin khan Aizawl Press Club-ah thuthar thehdarhtute kawmin Chief Minister's Rubber Mission (CMRM) an kalpui dan hrang hrangte a sawifiah a, CMRM chu kum 5 chhung kalpui tur a nih thu sawiin, Phase-I kalpui tawhin Mamit leh Kolasib District-ah khaw 24-ah Rubber tiak 4,50,000 phun a nih tawh thu leh kumin hian Phase-II ah District 8 chhunga khaw 117-ah kuthnathawktu mi 2,580 te hnenah Rubber tiak 11,92,050 phun belh leh turin hmalak mek a nih thu a sawi a. Kuthnathawktu thlanbik (progress partner) te chu kum 4 chhung sawrkarin an Rubber chinte hi a enkawl zui dawn tih pawh sawiin, an hmalakna te endik a nih hnuah an hnathawh tawh mil zela tanpuina pek tur a nih thu a sawi bawk.

Hei bakah hian Rubber tiak dawng si, phun duh lo emaw, midang hnena hralh chhawng emaw te chu progress partner an nihna hlih tur an nih thu leh tanpuina pek chhunzawm an nih loh tur thu  LR, S&WC Director chuan a sawi a. Tanpuina hi Direct Benefit Transfer (DBT) hmangin progress partner-te Bank Account-ah pek-chhuah tur a nih thu pawh a sawi bawk.