Chhiatna thleng thin-a inven dan tur sawiho

Disaster Management & Rehabilitation Department changtu Minister Prof. Lalnilawma chuan niminpiah khan Ministry of Home Affairs hotute kawmin Mizoram-a Chhiatna hrang hrang thleng thinte laka inven dan tur (Disaster Mitigation Initiatives) leh a kaihhnawih hmalakna kalpui mekte an thlirho.

He thutkhawm ah hian Mizoram tana Disaster Mitigation Project Sawrkar laipuiin a pawmpui tawh te a rang thei ang bera hmalak nghal dan turte, Project kalpuitu Institution-te thuamchak dan tur leh Project kalpui mekte chak lehzuala kalpui dan turte rel niin, Mizoram chu chhiatna thleng thin chi hrang hrang laka invendan leh chhiatna lo thlen thulha hmalak kawngah India hmarchhak-a State dangte tihhmuhtu ni thei tura hmalak dan turte an sawiho a ni.

Hei bakah hian Mizorama kalpui mek National Landslide Risk Mitigation Programme chu thlirho niin, Ministry of Home Affairs leh Mizoram Sawrkar chuan Mizoram a leilung pianhmang mumal zawka thliarfelna (Digital Elevation Model)-te, ram hmelhmang zirchianna (slope investigation) leh technical thil Project kalpuina tura tul angte tihhlawhtlin kawngah Geological Survey of India (GSI) leh Mizorama PWD Department-te chu thawhhona tha lehzual nei tura hmalakte rel a ni a. Project hrang hrang: Kangmei chhuak thei laka invendan (Forest-fire Management)-te, Lirnghing lo thlen thulha invendan te leh khawtlang mipuite nen tangruala chhiatna lo thleng thei laka inveng tura hmalakna kalpui mekte pawh thlirho nghal a ni a. Chhiatna thleng thinte laka inven kawngah a tam thei ang ber mipui vantlang an tel ve chu ngaihpawimawh ber tur pakhat a nih thu tarlan a ni a, Sawrkar chuan hemi kaihhnawiha hmalakna atan hian cheng vbc. 10 a dah hran tawh thu pawh tarlan a ni bawk.

Ministry of Home Affairs chuan Mizoram sawrkar chu tunhnaia Union Minister of Home Affairs-in State leh Union Territories zawng zawngte hnena a chah Disaster Resilience Agenda 10-te tihhlawhtlin kawngah Sawrkar laipui nen tangruala chak taka hma lakpui turin a sawm a. Hemi atan hian State DMA leh District Disaster Management Authorities (DDMA)-te thuam chak bakah State chhung hmun hrang hranga chhiatna hrang hrang kaihhnawiha hmalatu theuhte thuam chakte chu a pawimawh hle tih tarlan a ni.