Bangladesh raltlan te Biometric Enrolment zofel tawh

Bangladesh atanga Mizoram-a rawn raltlante Biometric Enrolment zawhfel a nih tawh laiin Myanmar atanga rawn raltlante Biometric Enrolment kalpui mek chuan July thla bul atang khan hma a sawn lo.

Home Department-a thawktute sawi danin Bangladesh atanga Mizorama rawn raltlan mi 1,679 te mit-naute leh kutze thla lak hna hi kumin July thla tir khan zawhfel a ni a. A hma lamah Serchhip District-a awm mi 235, Lunglei District a awm mi 76 leh Aizawl District a awm mi 7 te Biometric data chu lakkhawm zawh vek a ni tawh a. Bangladesh raltlan tamna ber Lawng-tlai District a mi 1,361 te Biometric data erawh chu lak zawh a ni lawk lova, July thla tir lam khan an zofel ta a. Lawngtlai District hi a zauh bakah kalpawh harsatna hmun kilkhawr leh ramri hnaih khua a tam avangin hna thawh a harsa hle niin Official-te chuan an sawi a. He District a awm Myan-mar raltlan 6,328 zinga mi 6,054-te Biometric data lak a ni tawh bawk a, hei hi raltlan awm atanga chhutin za zela 95.83 a ni bawk.

Myanmar raltlante biometric enrolment tih hna a chawlh rih chhan hi Electoral Roll Special Intensive Revision (SIR) kalpui a nih avanga District hrang hrang Official-te an buai vang a nih an rin thu Home Department hotute chuan an sawi a. Tun dinhmun thar berah chuan Mizoram District 7 – Aizawl, Champhai, Lunglei, Siaha, Mamit, Khawzawl leh Saitual te chuan an zofel vek tawh a. District 4-in an la zo lo a ni. Raltlan awm mek chhinchhiah zat 29,577 zinga 29,248 te biometric data chu lak zawh tawh a ni a. Zawh tawh chin hi za zela 98.89 niin Home Department chuan an chhinchhiah bawk a ni. Tarlan tawh angin Ministry of Home Affairs thu anga nikum July thla tawp atanga he hna hi thawh tan a ni a, tun thla chhung hian zawhfel hman a nih dawn leh dawn loh hriat a la ni lo tih an sawi a ni.