Aizawl-a Slaughter House-ah thla tin ran 600 vel talh

AH&Vety Department hnuaia Sa talhna, Slaughter House pahnih ah chawhrualin thla tin ran 600 vel talh ziah ang a ni a, ran talh zingah Bawng chu a tam ber a ni.

Nimin khan Aizawl Khatla-a State Veterinary Polyclinic Hospital Conference Hall-ah AH&Vety Department leh ICAR-NMRI, Hyderabad tangkawp buatsaihin Sa talhtute tan thianghlim taka Sa talh dan leh man man zawka hralh theih dan inzirtirna, ‘One Day Training on Hygenic meat production, meat safety and value addition technologies for Development of North-Eastern India’neih a ni a, he hunah hian Aizawl-a Sa zuar leh ran talhtu mi 20 vel telin Veterinary Officer Dr. Michael V. Lalrinzuala chuan Aizawl khawpuia Slaughter House pahnih ah thla tin ran 600 vel talh thin a nih thu a sawi a. Mualpui-ah leh Bawngkawn Brigade-ah Slaughter House an neih thu sawiin, Slaughter House hmang tur hian Sa talhtute chu an inziahluh a tul thu leh tunah hian Mualpui-ah Sa talhtu mi 48 leh Brigrade-ah mi 6 an inziaklut a, ni tin ran 20 vel bakah Inrinni-a zawrh turin Zirtawpni zan-ah ran 80 vel talh a ni thin tih a sawi a; Bawng talh tam berin, Sial leh Lawi pawh an talh thin thu leh Vawk erawh chu an talh meuh loh thu a sawi a ni.

Hei bakah hian ran talhtu inziaklut turte chu TB an vei leh vei loh endik thin a nih thu leh TB vei lo te chiah ziahluh theih a nih thu te, ran te pawh an hriselna dinhmun endikin, a hrisel lo deuhte chu Tuirial-a Sa leh a kaihhnawih bik bawlhhlawh paihna hmunah an paih thin thute pawh a sawi bawk a ni.