Aizawl-ah Chawlhkar khat chhung awh tur ‘Zo Fair’ (Aadhi Bazaar) neih tan a ni
Sawrkar laipui Ministry of Tribal Affairs-a Tribal Cooperative Marketing Development Federation of India (TRIFED) leh Mizoram sawrkar Cooperation Department tangkawp buatsaih India Hmarchhak State hrang hrang leh Mizoram hmun hrang hrang atanga kutthemthiamten an thilsiamte an phochhuahna hun, ‘Zo Fair’ (Aadhi Bazaar) hawnna hunah hian Chief Minister Lalduhoma chuan Tribal Forest products hrang hrangte vawnhim leh chawikan kawnga hmalatu Ministry leh Department te chungah lawmthu sawiin, “Hmarchhak mipuite hian Lehkhabu-a kan history-te ziaka kan dah hma daih atang tawh khan kan puantah-ah te, kan thiamhnangdeh-ah te kan chanchin hi kan lo ziak kai tawh a. Vawiina he Bazar-a kan thil pho, kan kutchhuakte kan en hian kum za tam tak chhunga kan lo inhlanchhawn tawh themthiamna leh kan nunphungte kan hmu tel a ni,” a ti a. Khawvel changkanna avangin khawl hmangin hmanraw tam tak kan dekchhuak tawh tih pawh sawiin, “Nimahsela, heng kan hnam thil, kan kutchhuakte erawh hi chu Vawiin thlengin kan dehchhuah dan a la ngai reng a. Kan hnam zia (identity) kan tah tel zel a, kan chanchin puangtute an ni. A dekchhuak thiamte pawh hi in hlu a, in lo bansan anga in thiamna hi in lo ngainep mai ang tihte a hlauhawm. Kan kutchhuakte hi kan tana kan siam ni mah se, min rawn duhpuitu an tam chho zel a, a hralhna hi a tha tial tial dawn a ni,” a ti bawk.
He hunah hian Khualzahawm Rural Development & Administration Minister Prof. Lalnilawma pawhin , Cooperative Movement chu ram dangah chuan mi tam takin an hlawhtlinpui tawh a. Mizoram-ah pawh hlawhtlinpui tumin ke kan pen mek tih a sawi a, “Tunhnaia Lammual-a Horti Fair kan buatsaihah pawh khan ni khatah cheng nuai 20 hu kan hralh ziah a ni. Kan Chief Minister-in a sawi fo thin Mizoram hmathlir, Viksit Mizoram 2047 thleng tur hian kan thingtlang khaw te ber thlenga khaw intodelh kan nih a ngai tih kan hria a. A bulhrum atangin hma kan la mek a ni,” a ti bawk.
Zo Fair (Aadhi Bazaar)-ah hian hmarchhak State hrang hrang atanga lo kal Stall 13 leh Mizoram atanga tel Stall 12, an vaiin Stall 25 an awm a. Heng zingah hian Tribal Food Cuisine Stall pahnih an tel a, a dang chu kut-a tah Textiles te, Mau atanga siam thilte, eitur lam leh Natural produce zawrhna Stall-te an ni a. A siamtu leh a leitute inkara palai (sumdawng) awm lova indawrna tura duan a ni a. A hawnna hunaah hian PS Thuingaleng IRS, Regional Manager, NE Region pawhin Mizoram-a an VDVK te chu hmarchhak Bial-a an VDVK tha ber berte an nih thu leh an thil siamchhuahte chuan a funna (packaging) mawi zawk a mamawh thu sawiin, chutianga an kalpui theih chuan a Market lamah hma an sawn a rin thu a sawi bawk.