Aadhaar enrolment leh update Fee la te chhui mek
Mizoram sawrkar-a Directorate of School Education chuan School naupang kum 5 leh kum 17 inkar tana Aadhaar enrolment ennawn leh siamthatna kalpui mek chungchangah thuchhuah siamin Unique Identification Authority of India (UIDAI) chuan State tinah Aadhaar enrolment chu hnapui bera neiin an kalpui thin thu leh he hmalakna hi Mizoram-ah chuan General Administration Department (GAD) in khaikhawmin Aadhaar Enrolment hi tha tak leh huapzo taka a kal theih nan Department hrang hranga thuneitute - Women & Child Development Department, National Health Mission (NHM)/Health & Family Welfare Department, Deputy Commissioners, School Education Department, Bank leh Public Sector Units, Post Office-a mi te chu Sub-Registrar ah ruat an nih thu an sawi a. He hmalakna ah hian School Education Department chuan Samagra Shiksha hnuaia BRC leh CRCC Staff thenkhat tlawmngaite hmangin Aadhaar Enrolment leh Mandatory Biometric Update (MBU) Camp te an buatsaih thin thu sawiin, “Hlawh dang nei lova an kalchhuah thin avangin New Enrolment leh update-na atan per head-in UIDAI atangin lak phalna an nei thin a. Enrolment fee hi an ei leh in, vah velna leh lehkha etc. mamawh phuhrukna atan hmangin, Department-ah chhunglut tura phut an ni ngai lo,” an ti.
Hetih mek lai hian kum 2025 September thla khan Aadhaar enrolment chungchangah naupang kum 5-17 chu kum khat chhung (October 2025 - October 2026) a thlawna Aadhaar enrolment leh update titurin thuchhuah siam a nih thu pawh tarlangin, “Hemi thu bawhzui hian Directorate of School Education chuan a thlawna kalpui tawh tur a ni tih District tinte hnenah hriattirna a lo pe chhuak tawh bawk a (vide letter No.B.12011/2/2025-DSE(PM POSHAN) of 17th October 2025). Amaherawh chu, District thenkhatah UIDAI thu kalh a naupang enrolment leh update processing fee lo la an awm nia Consumer Union-in thuchhuah a siam hi School Education Department chuan pawi a ti hle a, hetianga fee lo la rute hi chhui mek an ni,” an ti a. Aadhaar Enrolment tih thar leh Update hi tihmakmawh a nih avangin School Education Department chuan kalpui zel a tum thu leh hemi kawngah hian theihtawpa mitinte tanpuina leh thawhpuina an ngen thu an tarlang bawk a ni.
Tarlan tawh angin Serchhip District Consumers Association te chuan hetianga zirlai naupangte hnen atanga Aadhaar New Enrolment leh update-na atanga pawisa lak chungchang hi District Bawrhsap hnenah thlenin hma la turin an lo thlen tawh a. Niminpiah khan Mizoram Consumer Union pawhin sawrkar an ngenna thu an sawi ve leh bawk a ni.