Serchhip District in kangmei venna ah lawmman a dawng

Kumin Thal chhunga kangmei venna kawnga hma la tha thlanchhuah te hnenah nimin khan lawmman hlan niin Serchhip District chuan lawmman pahnihna a dawng a, Mizoram-a khaw hrang hrang zingah Serchhip District-a Leng khua chuan lawmman pakhat a dawng bawk.
Nimin khan Youth Recreation Centre, Falkland-ah Green Mizoram Day 2026 chu hman niin hetah hian kumin Thal chhunga kangmei venna kawnga hma la tha thlanchhuah te hnenah hian Environment, Forest & Climate Change (EF&CC) changtu Minister Lalthansanga chuan lawmman a hlan a, kangmei veng tha ber lawmman chu Lawngtlai District in dawngin Serchhip District chuan lawmman pahnihna a dawng a, he lawmman hi Serchhip Addl. DC Dorothy Muansangi chuan dawngin Aizawl District chuan lawmman pathumna an dawng bawk a ni.

Rampum huap-a kangmei veng tha khaw thlanchhuah te hnena lawmman sem ah Serchhip District-a Leng khua chuan lawmman pakhatna an dawng bawk a, Rulkual in lawmman pahnihna dawngin Muthi chuan lawmman pathumna an dawng bawk a ni. He hunah hian EF&CC Minister Lalthansanga chuan Mizoram in sik leh sa nuam tak, ramdang mite awh em em a neih theih chhan chu ramngaw leh thing kan neih that vang a ni tih sawiin, Thingkung leh ramngaw tangkaina leh hlutna te kan hriat thar deuh deuh a tul thu a sawi bawk.