Sick unit thin MIFCO-in hlêp an nei ve ta
Sick unit thin MIFCO-in hlêp an nei ve ta
Cheng vaibelchhe 1.35 leiba nei saa bul tan khan hlêp neiin an kalpui ta a, sawrkar tana phurrit ni tawh lovin, sawrkar puitu an ni ta mêk. Chu chu Mizoram Food & Allied Industries Corporation Limited (MIFCO) a ni.
MIFCO theitui tuai tharna :
May 7, 2026 chawhnu khan MIFCO chuan Chhingchhip-a an plant-ah 'Ready to Serve’ beverages Lakhuihthei leh Sapthei tui an tlangzarh a, in mai theih theitui chi hnih hi Finance Secretary Pu Ramchuana’n a tlangzarh a ni. Lakhuihthei leh Sapthei tuite hi Rs. 10 man-a siam a ni a, a hmain tui pawlh chawpa in theih tur Lakhuihthei leh Sapthei tui an lo siam tawh. Tuna mi erawh Rs. 10-a leia tui pawlh ngai lova in mai theih tur a ni; hmasâwnna pakhat a ni.
A tlangzarhtu thusawi tawi :
Tlangzarhtu Pu Ramchuana chuan, “13th Finance Commission-ah khan sum a harsa a, MIFCO pawh hi private kuta hlan rèl a ni. Sawrkar tharin hmalaknate chhawpin mumal deuha kalin product pahnih tlangzarh theiin kan awm leh ta a ni,” a ti. Hma la tak takte tanpui an inhuam thu sawiin, “Hmalâk tum tak takte tanpuina inpêk hi chu kan inhuam em em a ni,” a ti a. MIFCO thang zel chu thlâwp tlat turin mipui a sawm bawk.
PSU tihtawp vek duh tawh hnu :
Pu C. Lalnunnema, Vice President ZPM Gen. Hqrs. chuan, audit lama awm thin a nih avangin Corporation, PSU-te chu tihtawp vek an duh thin thu a sawi a, “Amaherawhchu, sawrkar thara kalphung thar ah kan ram tithang lian tura hmasâwnna ropui tak ka hmu a, hmasawn zawnga kan kal ta hi a lawmawm,” a ti a. Sawrkar puih ngai nih aiin, sawrkar tanpuitu nih a pawimawh zawk thu pawh a sawi.
Chairman-in hlêp a sawi
MIFCO Chairman Pu Lalthazuala Rawite chuan, in tur an siam chhuahte a hrisel a, a thianghlim thu a sawi. Sawrkara an leiba an rulh zawh mai bakah, kum 2024-25 khan cheng nuai 14 an hlêp thu a sawi bawk. “Kan siam hi ei tlak, ei atana hrisel leh changkang a ni a, FSSAI Certified a ni. Baibing, Rawtuai leh Mautuai Tîn siamchhuah thuai kan tum a, kan enchhin mêk,” a ti a. Leiba cheng vbc. 1.35 awm sa an chhawm chu an rûl zo tawh a, an hlêp mak tawh zawk a ni.
MIFCO hian hmun thumah hmun lian tak tak an nei. Sairang-a an hmun chu Rel a thlen tâk avangin Warehouse Complex atan siam an tum a. Bungbangla-a ran talhna chu Outsource tawhin, Zo Meat kutah an dah a, anni hian Vawksa thianghlim an zuar. MIFCO, Chhingchhip-ah processing Unit pahnih an buatsaih leh dawn niin Pu H. Lalrochâma, General Manager chuan a sawi. MIFCO hian sawrkar phalna in buhfai an supply a, petrol pump siam turin hma an la mek bawk.
Tlipna :
Tunhma chuan kan PSU-te hi 'sick unit' tiin sawi a ni a, hnathawktu tam tak chawlhtir an lo ni tawh. Sawrkarin a manganpui a, hmun tha leh khawl tha tak tak nena a thuam chungin, sawrkar sum ei raltu mai an ni thin. Thawktute hlawh ah sum a kal ral nasa em em a, senso a tam thin hle.
Tunah chuan MIFCO chu a hlawk zawngin a kal tan ta a, ZOHANDCO pawh a hlawk zawnga a kal theih ngei beisei bawk ang.