Mizoram-ah Police indaihlohna a nasa tih Home Minister in a sawi

Home Minister K. Sapdanga chuan Mizoram-ah Police indaihlohna a nasa tih sawiin, tunah hian post 350 la leh turin hmalak mek a nih thu a sawi.

Home Minister K. Sapdanga hian nimin khan Serkhan-ah Police Out-Post thar hawngin Mizoram Police indaihlohna a nasa hle tih sawiin, “Kan mamawh zat pawh kan la indah thei lo a ni,” a ti a. Post ruak hnawhkhah loh hi 4,800 vel lai a awm mek thu leh sum lama harsatna avangin indahkhat zung zung theih a nih loh thu sawiin, “Kan Police te an thawkrim em em a, indaih lo chung chungin thahnemngai takin an thawk a, he Out-Post hawn thar pawh hian mipuite thlawpna leh thawhpuina a mamawh hle dawn a ni,” a ti a. “Sawrkar tharah Police lak hmasa ber kan neih khan laina leh party induhsakna tel lovin a tling tling leh a tha tha kan la a, kan ram venghima kan ram dinhmun hriltu pawimawh ber pawl an nih avangin Police lak hi uluk leh fimkhur taka kalpui a ni. Tunah hian post 350 atan 'recruitment' kan tuak leh mek a, 'Physical Efficiency Test' hi 'Qualifing Ground' atan ringawt hmang lovin 'Merit' atan hman tel kan tum a. Mi fel leh tling rual zingah a chak chak thlanchhuah kan duh a ni,” a ti bawk.

Home Minister chuan kum 2025 kha 'Mizoram Police Fitness a hmasawnna beihpui thlak kum' a kalpui a nih hnuah kumin, kum 2026 hi 'Discipline tha kenkawh kum' atan an hmang mek tih sawiin, “Hmasawnna awm tur chuan inhriatthiamna kan paih bo hret hret a tul a ni,” a ti a. Police hna kalpui danah dik tak leh langtlang taka kalpui a nih thu tarlangin, hriselna ngaih pawimawh zual zel a nih tur thu a sawi a. Police Out-Post chu dan leh thupek kengkawhtu, Police te leh khawtlang mipuite indawrtawnna hmun pawimawh tak a nih thu sawiin, thawktute pawh mipui thlamuan thei turin hawihhawm tak leh inpekna thuk tak nen he Out-Post hi enkawl turin a fuih bawk.

Serkhan-a Police Out-Post hawnna hunah hian IGP (Hqrs.) H. Ramthlengliana chuan kum 2020 December khan Serkhan-a Police Outpost din dilna hi thehluh a nih thu sawiin, “January ni 14, 2021 khan SP Kolasib chuan zirchianna uluk taka a neih hnuin Serkhan Police Out-Post din a tul zia leh a tangkai dan tur hrang hrang ziakin a thehlut leh a. A tul ang angte bawhzui zel niin a hmun tur ramte en fel a nih hnuah February 2026 khan Mizoram Sawrkar chuan Serkhan Police Out-Post dinna tur Notification a tichhuak ta a ni,” a ti a. Tun dinhmunah Serkhan Police Out-Post hawn takah hian thawktu mi 5 an awm dawn a, chhungte chu Sub-Inspector 1, Head Constable 2, Constable 1 leh Driver 1 an ni a. He Out-Post hian khaw 6- Serkhan, Lungdai, Lungmuat, Nisapui, Bukpui leh N. Chaltlang a huam dawn a ni.