Serchhip-ah Green Mizoram Day 2026 hmangin thingtiak phun enkawl zui kawngah inelna neih a ni dawn

Mizoram ti hring tura thingphun beihpui thlakna ni, Green Mizoram Day chu nimin khan Mizoram-ah hman niin Serchhip-ah pawh Bawrhsap Paul L. Khuma hovin he ni hi hman a ni a, sawrkar Department leh tlawmngai pawl ten Serchhip leh Keitum inkarah thingtiak phunin thingtiak phun enkawl zuina kawngah intihsiakna neih a ni ang.
Serchhip-ah chuan Green Mizoram Day pual hian Serchhip DC Pisapui Hall-ah hun hman hmasak niin Bawrhsap Paul L. Khuma chuan he hun hi khuallian nia hmanpuiin Bible-ah Pathian in thing leh nungcha chi hrang hrang a siam thu kan hmuh rualin a enkawl tura mihring te min dah thu kan hmu tih a sawi a, “Mihringte mamawh tur engkim a siam hnuah mihring hi a siam a, a thilsiam, tha a tih em em te enkawl hi kan mawhphurhna ah a dah a. Kan mamawh leh kan dam khawchhuahna atana pawimawh em em te hi kan kut-a awm an ni,” tiin “In mamawh tawn kan nih hriain thing te an dam khawchhuah nana venhim hi kan mawhphurhna a ni a, kan nunna atana kan mamawh ber boruak thianghlim kan neih theih nan thing a pawimawh bakah, boruak a ti nuam a, nun a tinuam a ni,” a ti a. Kan thingphun te pawh enkawl zui a ngai a nih chuan midang tih turah dah lovin kan ta a nih anga kan enkawl zui a tul thu sawiin, kumdang-a thingphun te zingah thi leh enkawl zui loh a tam thin nia sawi a awm avangin kumin hian Plot hrang hranga thingphun te a nun khawchhuah danah inelna thinghlim kalpui a nih dawn thu a sawi bawk a ni.

Green Mizoram Day puala hun hman hi Thenzawl Forest Division-a DFO Dr. R. Lalnunrenga chuan kaihruaiin Green Mizoram Day lo intan dan te a sawi a, kum 2011 atangin thupui nei-a hmangin kumin hian ‘Thing hi rangkachak anga hlu, Nunna tinreng bul a ni’ tih chu thupui atan hman a nih thu a sawi a. Kum 2014 atangin June 11-ah hman a nih thu leh nikum thlengin thingtiak 29,74,318 semin 17,79,503 phun a nih tawh thu a sawi bawk.

Serchhip-a Green Mizoram Day hman ah hian Govt. Serchhip College Department of Zoology-a Asst. Professor, Dr. C. Vanlalnghaka chuan kumin-a Green Mizoram Day thupui hmang hian thu a sawi a, he huna kalkhawm ten he ni puala thutiam chham rualin hemi hnu hian New Serchhip Kikawn atanga Keitum inkar, Serchhip By-Pass Road-ah sawrkar Department leh NGO 30 ten thingtiak an phun nghal a ni.