Revenue Department Review Meeting nei
Niminpiah khan Aizawl-a Folkland Park Conference Room-ah Land Revenue & Settlement Department hian State Level Review Meeting neiin an Department hmalak mekna te leh hmathlir bakah an hnathawh kawnga harsatna hrang hrangte sutkian dan tur an sawiho a. He hunah hian Revenue Minister chuan Revenue Department chu Mizoram State in ama puala sum a hmuh theihna, State Own Revenue source pawimawh tak a nih thu sawiin, mipuite pawhin Mizoram State in ama puala sum a thawhchhuah pawimawhna an hrethiam chho zel a, kum kalta a Stamps & Registration bakah Land Tax leh Non-Tax atanga Department sum lakluh pawh vbc. 40.23 a tling chho ta mek tih sawiin, “A pung chho tha hle a, heng sum te hi Mizoram Sawrkar ta liau liau, State mamawha hman tur a ni,” a ti. Minister chuan Ram hlutna chhutna (Land Valuation) mumal nei turin MZU Economics Department-a thiamna hman tangkai mek a ni h thu sawiin, Tax pe lo te chhuichhuah leh umzui hna pawh Online Tax Payment 2.0 hmangin chak taka enzui mek a nih thu a sawi bawk.
LR&S Minister B. Lalchhanzova chuan kum hnih leh a chanve chauh ama ho a an thawhho chhungin thawktute tanrualna avangin mipui pawhin thil tha tih tum leh hmasawn tum hmuha LR&S Department an hmu nia a hriat thu sawiin, lawmawm a tih thu a sawi a. LR&S Department chu thawktu za zela sawmnga chauh hnawhkhah ni chunga hna thawk mek an nih thu sawiin, hnathawh tur a tam bakah mipuiin an mamawhna a sang a; chung karah chuan technology nen tangkawp zelin thawktute pawhin an indaihlohna hmulian lovin, mahni tawkah theihtawp chhuah theuh turin a chah bawk a ni. Revenue kaihhnawihah Office leh In lamah amah hmu an tam thin thu Minister chuan sawiin, amah hmuh tumtu an tlem hunah LR&S Department-in Revenue Reforms an kalpui mek chu a hlawhtling a tih ngam ang tih a sawi bawk.
Review Meeting hi LR&S Secretary Vanlalmawia IAS chuan kaihruaiin Administrative Department bakah Directorate leh District tin Assistant Commissioner-te hnen atangin an hmalakna ngaihthlak a ni bawk.