Remna ni pualin MLA ni mek leh MLA lo ni tawhten sawihona nei

Mizoram Peace Accord vawi 40-na pualin nimin khan ‘40 Years of Harmony: Legislative Dialogue on Peace Building’ tih thupui hmangin sawihona neih a ni a, Assembly Deputy Speaker Lalfamkima chuan hmanpuiin MLA ni mekte leh MLA lo ni tawhte an tel a ni.

Zoram Research Foundation, Aijal Club leh NCCI hnuaia India Peace Centre ten Mizoram State Planning Board Meeting Room-a he sawihona an buatsaih ah hian Deputy Speaker Lalfamkima chuan Zofate tan hun kal tawh hriatreng a pawimawh thu sawiin, kum 1986 hma lamah chuan Mizoram chu silai puak thawm leh nunau mangang au rawla khat a ni thin tih a sawi a. Remna kan neih hnuah chuan hlauhna tel lovin Mizoram chuan ropui zawngin hmalam a pan mek tih sawiin, Inremna kan neih theihna atana thawktu hruaitu hmasa Rajiv Gandhi-a te, Laldenga te, ram hruaitute leh Kohhran leh khawtlang hruaitute inpekna thuk tak vang a ni tih a sawi a. He Mizoram Peace Accord hi khawvel hriatah pawh chhuanawm tham a nih thu sawiin, he Accord hlutzia hrereng chunga vawnhim hna thawh zel chu an mawhphurhna a nih thu a sawi bawk.

He hunah hian MLA leh MLA hlui kalkhawmte chuan kum 40 liamtaa Mizoram Peace Accord ziah a nih atanga tun thlenga Mizoram in remna tluantling kan neih dante, inremna ngelnghet kan neih avanga kum 40 chhunga kawng hrang hranga Mizoram dinhmun te leh remna boruak hnuaia Mizoram than zelna tur leh hmasawnna tur kawngte an sawiho a. Remna leh muanna derthawnzia hre reng chungin kum 40 chhung kan lo vawnhim tawh inremna chu chhawmnung zel turin mipui aiawha thlan MLA te pawimawhna pawh an sawiho bawk a ni.