Rashtriya Gramin Vikas Sammelan-ah Minister tel

Rural Development Minister Prof. Lalnilawma chu nimin khan New Delhi-a ‘Rashtriya Gramin Vikas Sammelan’ ah a tel.

He Sammelan hi Ministry of Rural Development, Govt. of India in MGNREGA thlaktu, thingtlang mipui te inhlawhna tur, Viksit Bharat - Guarantee for Rozgar and Ajeevika Mission Gramin (VB-GRAMG) te, thingtlang nuho hmasawnna tur National Rural Livelihood Mission leh Pradhan Mantri Awaas Yojona-Gramin leh Scheme dangte chungchang sawihona atana a buatsaih niin Union Minister of Rural Development, Shivraj Singh Chouhan chuan a ho a, State hrang hranga Rural Development Minister te an tel kim hle a. VB-GRAMG atana Central Sawrkar in Mizoram tan cheng vbc. 611.65 a pek tawh thu te, State Matching Share cheng vbc. 67.95 pawh State Sawrkar in a tihfel tawh thute he hunah hian sawilan a ni a. Rampum ah VB-GRAMG hman a nih dawn tak avanga MGNREGA a State tin ten leiba an neih te sawiho niin, chung leiba chu Central Sawrkarin chinfel a tum dan te sawiho a ni bawk.

Rashtriya Gramin Vikas Sammelan-ah hian Mizoram atanga tel RD Minister Prof. Lalnilawma chuan Mizoram chu State Scheme siam hmasa ber a nih thu te, State Rules hrang hrang pawh a ruangam peih vek a ni tawh thu te, Internet connectivity chiangkuang lo chung chunga e-KYC leh Face Authentication ah Mizoram chu a sang pawl an nih thu te a sawi a. MGNREGA hnuaia Contractual staff te hlawh, Central liability te chinfel a nih vat theih nan Ministry of Rural Development hotute a ngen a. MGNREGA ang bawka VB-GRAMG chu tangkai taka mipuiin an hman zel a beisei thu te a sawi bawk.

RD Minister hi National Rural Livelihood Mission-a Performance Review Meeting-ah telin tun Financial Year a hmalak dan tur te a sawi a. Thingtlang nuho in awlsam leh hlawk zawka Central Sawrkar Scheme te an chhawr theih nan Mizoram chu a bik taka ngaihtuah turin Union Minister a ngen bawk.

Hei bakah hian Pradhan Mantri Awaas Yojona-Gramin pawh thingtlanga mi rethei zawk ten an chhawr thuai theihna turin Central Sawrkar leh State Sawrkar te thawhhona tha a pawimawh thu a sawi a. AwaasPlus Survey zawh a nih veleh sum pawh pe thuai turin a ngen bawk.