Power Department hmathlir leh hmachhawp sawiho

Kumin May 29-a Mizoram-a rawn zin Union Union Power Minister Manoharlal leh Chief Minister Lalduhoma te inkawm tuma thu an dah te bawhzui dan tur relin nimin khan Power & Electricity Department Minister F. Rodingliana kaihhruaina hnuaiah Finance Department leh Planning Department hotute an thukhawm.

He thutkhawm ah hian Tuivai Hydel Project, Tuichang Pump Storage Project leh Pump Storage Project dang siamna tur bakah P&E Department Corporation-a let tura hmalakna kal mek chungchang te sawiho a ni a. Power-a intodelh tura Sawrkar hmalak mekna leh sum ruahman dan turte ngun taka sawiho niin kawlphetha Megawatt 132 tharchhuak thei Tuivai Hydel Project DPR peihfel tawh chu hna bultan nan sum engamawzat dah rel a ni.

P&E Department Corporatization chungchang he thutkhawm a sawiho ah hian hmalakna kal mek chu chak zawka bawhzui rel a ni a. Hemi chungchangah hian Engineer-in-Chief, P&E Department chuan tun ang renga P&E Department-in hma a sawn chhoh a, hmalak mekna Power siamchhuah belh kawnga hlawhtlinna hmuh a nih zel chuan Department hnuaia thawktute pawhin mipui leh sawrkar hlawkna tur a nih phawt chuan Corporation anga awm an hnial loh thu a sawi a. Amaherawhchu thawklehkhata tih hlawhtlin nghal vut vut theih a nih loh thu a sawi bawk a. Department pawhin Corporate lam hawia hmalakna an kalpui mek thu sawiin, Department chu hlawm thum- Transmission, Distribution leh Generation-a then hrang turin Unbundling tih mek a nih thu a sawi bawk.

He thutkhawm ah hian Adviser to Chief Minister (Finance) TBC. Lalvenchhunga bakah Power & Electricity Department, Finance leh P&PIM Department hotute pawh an tel a ni.