Kangmei venna kawnga hma la tha lawmman hlan

Serchhip District chhunga kangmei venna-a hma la tha te hnenah nimin khan lawmman hlanna neih a ni.
Kumin kumtir lama District Level Fire Prevention Committee thukhawmin kumin Thal chhunga kangmei ven kawnga hma la tha te hnena lamman hlan a lo rel tawh angin nimin-a Green Mizoram Day puala inkhawm Serchhip-a neih ah lawmman hi hlan a ni a. Kangmei venna kawnga hma la tha khua thlanchhuah ah Leng khua chuan lawmman pakhatna dawngin East Lungdar chuan lawmman pahnihna an dawn bakah Chhingchhip Mualpui in lawmman pathumna an dawng a. Lung-chhuan, Chhiahtlang South leh Thenzawl Kanan ten Consolation Prize an dawng bawk a ni.

Hei bakah hian Kangmei venna kawnga mipui zirtirna thu chhuah tha YMA Chanchinbu thlanna ah YMA Palai (Serchhip Kawpui North Branch) chuan lawmman pakhatna dawngin Hmar Arsi (Serchhip Hmar Veng Branch) chuan lawmman pahnihna leh Zonunmawi (Serchhip Chhim Veng Branch) in lawmman pathumna an dawng bawk a ni.