NITI Aayog leh NE Chief Minister te an inkawm

Nimin khan New Delhi-a NITI Aayog Office-ah NITI Aayog leh hmarchhak Chief Minister leh Chief Secretary te chu an inkawm a, he hunah hian Chief Minister Lalduhoma chuan Mizoram mamawh hrang hrang a thlen a ni.

Nimin-a inkawmna ah hian NITI Aayog CEO Nidhi Chhibber-i chuan inlawmna thu sawiin, Vice Chairman Ashok Kumar Lahiri chuan he hun an buatsaih chhan te a sawi a. Chief Minister Lalduhoma chuan NITI Aayog Member atana hmarchhak mi Dr. Joram Aniya ruat a nih avanga lawmthu sawiin, tinzawn neia hmarchhak State hruaitute tana Meeting an buatsaih chu tha a tih thu a sawi a. Mizoram tana 'All India Service' (AIS) Cadre hran neih a tul thu leh a pawimawhzia sawiin, hemi chungchangah hian Arunachal Pradesh Chief Minister Pema Khandu nen pawh hma an la dun a. State hmasawnna atana Cadre hrang neih a tulzia leh a hlawkna tur hrang hrangte a sawi bawk. Hei bakah hian Chief Minister chuan Thenzawl-a Peace City din tura hmalak mekna tarlangin, Prime Minister Indira Gandhi ngenna avanga remna hna thawk tura Police hna a bansan thu te, MP nihna chawlhsan thu leh mimal taka a lo tawrh ve na te hriatsak chunga Peace City hmasawn zelna tura theihtawp chhuahpui zel turin a ngen bawk a ni.

High Level Task Force on Northeast Economic Corridor-a Convener a nihna angin Chief Minister chuan Thailand thlenga kal tur India-Myanmar-Thailand (IMT) Trilateral Highway chu tihhlawhtlin vat a tul thu sawiin, Kaladan Multi Modal Transit Transport Project (KMMTTP) pawh ti khawmuang tawh lova a hun taka zawh ngei tha a tih thu a sawi a. Aspirational Districts and Aspirational Blocks Programme hnuaia Hmarchhak bial, a bikin Mizoram chhunga a huam chinte ennawn a tul thu sawiin, tuna hman mek tehfung (criteria) te chuan tlangram leh ramri hrula awm State-te dinhmun dik tak a phochhuak tawk lo niin a sawi a. Centrally Sponsored Schemes kaihhruaina (guideline) pawh Northeast-ah a nih ang anga hman rem lo tam tak a awm thu sawiin, kan tlangram mila siamrem leh herrem a tul thu a sawi bawk.

Chief Minister chuan Mizoram Ginger Mission hnuaia Sawhthing sawngbawlna din turte tihhlawhtlin vat a nih theihna turin NITI Aayog puihna a ngen a, Tourism lama kan hmasawnna tur hrang hrang bakah Sports Department hnuaia Empowering Mizoram Sports kalpui mek a nih dan leh hmasawn leh zelna tur kawng hrang hrangte a tarlan bakah Hmarchhak States te tana 10% Gross Budgetary Support sawrkar laipuiin a duan chu a tangkai hle tih sawiin, hemi hnuaiah hian funding chu a nihna ang taka State te pek a, State sawrkarin scheme a duan te leh hmasawnna hna pawimawh bikte thawh nana hman theih tura siam a tul thu te a tarlang bawk a ni.