Nikum-ah khuarel chhiatna thleng ah mi 13 thiin mi 12 chu leimin vanga thi an ni

Nikum 2025 chhung khan Mizoram-ah khuarel chhiatna thleng vangin mi 13 an thi a, vanduiana vanga thi zinga 12 hi leimin vang niin midang pakhat hi kangmei vanga thi a ni.

Zalen RTI zawhna Disaster Management & Rehabilitation Department-a SPIO in a chhan danin nikum (2025) chhung khan Mizoram-ah leimin vangin In chhia 295 awmin Thlipui vangin In chhia 85 leh kangmei vanga In chhia 97 a awm a. Tuilian leh lirnghing vanga In chhia a awm lo thung a. Kum 2025 chhunga lirnghin dan chungchang zawhna chhangin SPIO chuan magnitude 3 leh a aia na lirnghing tum 5 chhinchhiah a ni tih sawiin, a thlenna hmun hi Mamit District ah tum hnih leh Hnahthial, Champhai leh Khawzawl District-ah te tum khat niin a sawi a. Lirnghing nat ber tum chu ni 2.3.2025 niin hemi tuma a nat zawng hi 3.7 magnitude a ni a, lirnghing hian tihchhiat a nei lo tih a tarlang bawk.

Khuarel chhiatna tawk te chhawmdawlna pek an nih dan zawhna chhangin SPIO chuan Disaster Management Division, Ministry of Home Affairs inkaihhruaina anga pek thin a ni tih a sawi a. Leimin, thlipui, tuilian leh kangmei vanga thite hnenah sawrkar laipui inkaihhruaina angin mitthi chhungte hnenah Rs. 4,00,000 pek thin a ni a. Chhawmdawlna pawisa hi sawrkar laipui leh State sawrkar ten 90:10 a intum semin Central in 90% leh State in 10% a pe thin tih a tarlang bawk.

Khuarel chhiatna hrang hrang thleng thei laka sawrkar inbuatsaih dan tlangpui pawh sawi bawkin khuarel chhiatna chungchanga mipui ten an tih tur leh tih loh tur Awareness chu Radio kaltlang te, Pamphlet hmang te, Hoarding hmangte leh Training hmangte in neih a ni a. Sawrkar hnathawk, NGO te leh zirlai te hnenah Disaster Training neih a ni bawk. Hei bakah hian District tinah chhanchhuahna hnathawktu tur Quick Response Team (QRT) din a ni. Police Batallion hrang hrangte pawh chhanchhuahna hnathawk thei turin Training pek an ni bawk a. Mipui ten awlsam taka chhiatna thleng an report theihna turin Khaurel Apps siam a ni bawk.

Heng bakah hian District Disaster Management Authority (DDMA) tin ten Zonal Officer siamin heng Zonal Officer te hi anmahni huamchhung theuha chhiatna thleng buaipui tura tih an ni a. State Emergency Operation Centre (SEOC) leh District Emergency Operation Centre (DEOC) te chu 24x7 a function a ni a. District Disaster Management Authority (DDMA) tin ten anmahni huamchhung theuha an hman tur Silpaulin pawh an dahkhawl bawk a ni.