Zu kawl leh in phalna 'Red Card' pek chhuah la awm lo

Excise & Narcotics Department (END) in hriselna kaihhnawih avanga zu kawl leh zu in phalna 'Red Card' an pekchhuah turah mi engemawzatin dilna form la chhuak tawh mah se tun thlengin 'Red Card' pekchhuah a la awm lo.
END hotute sawi danin, hriselna kaihhnawih avanga Zu kawl leh in phalna 'Red Card' hi dilna lachhuak awm nual tawh mah se tun thlengin dilna thehlut an la awm lo a ni. Excise & Narcotics Department chuan Section 45 B(1) of the Mizoram Liquor (Prohibition) Amendment Act, 2025 tlawhchhanin, hriselna kaihhnawih vanga sap zu (IMFL) kawl leh zu in phalna permit 'Red Card' chu mamawhtute tan a pechhuak dawn a. Red Card hmanga IMFL hralh chhuak tur hian engkim peihfel a ni tawh a. tun thla June ni 3 atang khan Red Card dilna form an pechhuak tan tawh a ni.

Red Card nei tur hian Doctor te'n damdawi atana an chawhna lehkha an neih hnuah an awmna District Medical Superintendent ten an chawhna chhante enfiahin, phalna an pekte hnenah chauh Red Card hi pek an ni dawn a. Red Card hi kum khatah Rs. 5,000 man zel a ni dawn a, Red Card hi a diltu hnena pek an nih chuan kum khat a nung anga. Aizawl-a Excise Office-ah END chuan Departmental Store siamin, zu an man, Court-in a tihfel tawhte chu Red Card neite tana hralh chhuah a ni dawn a. Zu chu a man pangngai aia zaa 75-a tlawmin hralh a ni dawn a ni.