MSHCS-in ISO Certification leh AB PM-JAY Award a dawn hriatrengna hun Minister hovin hman a ni

Mizoram State Health Care Society (MSHCS)-in ISO (International Organization for Standardization) Certification leh AB PM-JAY Award a dawn hriatrengna (commemoration) hun chu nimin khan Health Minister Lalrinpuii hovin hman a ni.

SAD Conference Hall-II a he hun hman ah hian Health Minister Lalrinpuii chuan Mizoram State Health Care Society (MSHCS)-in tunhnaia ISO Certification mai bakah National Award chi hnih, PM-JAY hnuaiah Best State – Beneficiary Enrollment Award leh Best Performing Small State – Highest No. of ‘Bio-Authentication’ done in FY 2025-26 Award a dawng thei chu a lawmpui thu sawiin, MUHCS tluang taka kalpui a nih theihna tura ngaihtuahna, tha leh zung sengtu zawng zawngte leh CEO leh staff-te inpekna chhuanawm a tih thu a sawi a. Mizoram Universal HealthCare Scheme (MUHCS) chu Zoram mipui tana Scheme chhenfakawm a nih chhunzawm zel theih nan Sawrkar chuan tha thlah lovin Scheme hmasawnna tur kawng a dap chhunzawm zel dawn tih a sawi bawk.

Sawrkar chuan April ni 1, 2026 hnulamah MUHCS bill atan cheng vbc. 22.7, Mizoram chhunga inenkawlna cheng vbc. 13.45 leh Mizoram pawna inenkawlna cheng vbc. 9.2 chu Dawmdawi In hnenah a pechhuak tawh tih sawiin, “A hun taka damdawi In hnena bill pekchhuah hi sawrkarin a ngai pawimawh a, khaihlak awmloa dawmdawi In hnena bill pekchhuah zel a nih theih nan sawrkar chuan theihtawp a chhuah,” a ti a. Kum 2025-2026 chhung atana cheng vbc. 50 budget-a sawrkarin a dah chu kum 2026-2027-ah cheng vbc. 130-ah a tihpun thu Minister chuan a sawi bawk.

MUHCS hmanga State pawn Empanelled Hospital-a enkawlna mamawh ten Medical Refer Board an paltlang hmasak a ngaih thin thu pawh Minister chuan sawiin, Refer Board awmlohna khuaa cheng ten awlsam zawka Refer Board an hmachhawn theihna turin sawrkar chuan District tina Medical Superintendent-te kaihhruaina hnuaia Virtual-a damlo ten Medical Refer Board an hmachhawn thei tawh thu a sawi a. “MUHCS hi Zoram mipui tana Scheme thlamuanpui tlak ni chhunzawm zel turin Mizo mipui zawng zawngte thlawpna leh thawhpuina ka dil a. Damloh nikhuaa inenkawlna senso phurrit ni thin leh chhungkaw tam tak tana lungngaihna thlentu ni thin chu MUHCS hmanga sutkian a nih zel theih ka beisei,” a ti bawk.

Mizoram State Health Care Society-in ISO Certification a hmuh hi Mizoram Health System Strengthening Project (MHSSP) hnuaia hmalakna a ni a. He ISO 9001:2015 Certification a hmuh hi Quality Management System tehfung hrang hrang a paltlang tihna a ni.