Home Minister in Department enkawl leh ZPM boruak tha lo nia sawi chungchang a sawifiah
Nimin-a a chenna In-a chanchinbumi thenkhat a kawmnaah Home Minister K Sapdanga chuan a enkawl thin DP&AR enkawl zui lova Chief Minister in a chan tak chungchanga zawhna chhangin Department enkawltu siksawi chu Chief Minister thuneihna a nih thu sawiin, a tul a tih angin a siksawi a, a duh chuan midang pawh a pe thei tih a sawi a. DP&AR enkawl chu a hautak hle tih sawiin, midang kut-a a awm ta chu lawmawm a tih thu leh Chief Minister hian a enkawl hneh viau a rin thu te a sawi a. ZPM kaihhruai sawrkarin tihhlawhtlin a duh Aikal lak tihtawp te, sawrkar Pisa kai hun mumal taka kalpui leh thil dangte chu sawrkar hnathawk Officer te zarah an tih-hlawhtlin theih thu a sawi a, DP&AR Officer zingah chunglam thu ni mah se dik lova an hriat hnial ngam an awm sawiin, Politics thil deuha an ngaihdante chu Officer ten an hnial hreh lo niin a sawi bawk.
Minister K. Sapdanga chuan sawrkar hmalakna leh hmasawnna hrang hrang tarlangin, e-office kalpui a nih hnuah sawrkar pisa hnathawh a chak zawk thu leh RTI zawhna te pawh awlsam zawka chhan zung zung a nih tawh thu a sawi a. Chhan ran leh ran loh aia pawimawh chu a chhanna a dik em tih a nih zawk thu a sawi.
ZPM party chhungkuaah boruak tha lo a awm ang thuthang chungchangah ngaihdan in ang lo neite chu an awm thu leh chu chu pawl dangah pawh a awm tho tih a sawi a. NDA zawm chung-changa Chief Minister nen an ngaihdan a in-an thu sawiin, NDA chu zawm kher lovin thian tha tak atan erawh chuan tha an ti a, hei hi a an sawrkar tirah an ngaihdan a nih thu a sawi bawk.