Jute chin kawnga hmala turin thawhhona ziah a ni

Mizoram sawrkar Agriculture & Farmers' Welfare Department chuan nimin khan Jute Corporation of India, National Jute Board leh Indian Council of Agricultural Research - Central Research Institute for Jute and Allied Fibers (ICAR-CRIJAF) te nen thawhhona thuthlung (Memorandum of Understanding) an ziak.

He thawhhona thuthlung hi Agriculture & Farmers’ Welfare Minister PC. Vanlalruata Pisa-ah ziah niin NJB leh JCI te hi Ministry of Textiles, Govt. of India hnuaia awm a ni a, Jute chungchanga India rama thuneitu sang ber niin, ICAR-CRIJAF hi Ministry of Agriculture & Farmers' Welfare hnuaia awm niin, Jute Cultivation lama Research tihna hmunpui a ni.

NJB hian Jute cultivation atan Jute-iCARE tih Project an kalpui mek a, he Project hi Mizoram District pathum - Lunglei, Lawngtlai leh Mamit-ah te kalpui a ni dawn a. JCI chuan farmers te Jute chungchangah inhrilhhriatna (awareness) leh inzirtirna (capacity building) an kalpui anga, Jute tharchhuah te hi Central Sawrkarin Jute tana Minimum Support Price (MSP) an bituk ang zelin farmer te atangin an lei dawn a. Mizoram-ah hlawhtling taka Jute chin a nih theih nan Research leh Technical Input ttul angte chu ICAR-CRIJAF hian an lo kalpui ve dawn bawk a ni.

India ramah hian Jute mamawhna a san em em laiin ramdang atangin India chuan a lalut nasa hle a. Hei vang hian Central Sawrkar pawhin Jute-a kan intodelh theihnan theihtawp a chhuah mek a. NJB leh JCI te kaltlang hian Central Sawrkar chuan Jute ching tura tul hrang hrang - a chi (seed) te, a chinna hmanrua leh khawl te leh a sawng-bawlna hmanrua te thlengin a thlawnin a rawn tum vek dawn a. Kumin hian Mizoram-ah chuan Lunglei District-a Tlabung MPACS te-nen tangkawpin Jute cultivation hi kalpui tan mek a ni.