ICT Minister hovin Aizawl-ah ‘National Statistics Day’ hman a ni

Nimin khan ‘National Statistics Day’ vawi 20-na chu Aizawl-a Directorate of Economics & Statistics Conference Hall-ah hman a ni a, he hun hi Information & Communication Technology (ICT) Department Minister Dr. Vanlalthlana chuan a hmanpui a ni.

Kumin-a National Statistics Day-ah hian thupui (Theme) atan ‘Unlocking the potential of Administrative Data’ tih hman niin nimin-a hun hman ah hian ICT Minister Dr. Vanlalthlana chuan khawvel thang zel leh changkang zelah Data leh Statistics pawimawhna a langchiang telh telh tih sawiin, Sawrkar pawh tha taka a kal theihnan sawrkar in data dik a mamawh thu a sawi a, thuthlukna fel leh dik siamnana pawimawh ber pakhat a nih thu a sawi bawk a. Data dik neih mai bakah data phena thil thlen chhan chhui a pawimawh tel thu a sawi bawk. He hunah hian ICT Minister hian ICT leh Directorate of Economics & Statistics thawkduna siam, Mizoram Civil Registration System (CRS) Portal a tlangzarh nghal a. CRS hi Mizoram puma Piang leh Thi chhinchhiahna tura siam a ni a, Central Sawrkar CRS Portal nena inchawmtawn thei tura duan niin, MeitY Empanelled CSP hnuaiah Cloud leiin he Portal hi siam a ni.

National Statistics Day puala hun hman hi Planning & Programme Implementation Department changtu Secretary, David Lalthantluanga IAS chuan kaihruaiin ICT-a Informatics Officer Lalrinfela hnen atangin CRS Mizoram Portal siam thar a nih dan Technical report ngaihthlak a ni a. Chawhnu lamah kumin Statistics Day Thupui ‘Unlocking the Potential of Administrative Data’ tih zirhona neih a ni a, Mary Lalrinchhungi, Jt. Director, Economics & Statistics chuan kaihruaiin Lalhmangaihsangi, Asst. Director, Economics & Statistics chuan thupui hmang hian thu sawiin, sawihona leh zawhna leh chhanna hun hman a ni bawk.

India ram tana Statistics lama sul sutu thawh hlawk tak Prof. Prasanta Chandra Mahalanobis-a chawimawi nan leh hriatreng nan a piancham June ni 29 hi India sawrkar chuan kum 2007 khan Statistics Day-ah puangin, kum tin hman thin a ni ta a. Prof. PC Mahalanobis hi June ni 29, 1893 khan piangin Scientist leh Statistician a ni a, kum 1931-a Indian Statistical Institute (ISI) dintu a ni.