DMF Governing Council thutkhawm neih a ni
Serchhip DC Meeting Hall-a District Mineral Foundation (DMF) Governing Council thutkhawm hi an Chairman leh District Bawrhsap Paul L. Khuma chuan kaihruaiin Directorate of Geology & Mining atangin Senior Geologist Malsawm-dawngliana chuan District Mineral Foundation (DMF) din a nih chhan leh a kalphung tlangpui a sawifiah a, Pradhan Mantri Khanij Kshetra Kalyan Yojana (PMKKKY) Scheme hnuaiah leilung hausakna (Mineral Resources) hrang hrang lai chhuaktu/mining ti tute emaw, Quarry nei emaw ten ram hawh/lei laih man emaw, an sum hmuhchhuah atanga sawrkara royalty an chhunluh thinte leh dân bawh-chhiat avanga an sum chawi (fine) tlingkhawmte chu DMF Fund-ah chhunluh niin ram hmasawn nan leh mipuite tan tangkai taka hman tur a nih thu a sawi a, he Scheme hnuaia hmalakna te chu DISHA-in a endik leh thin thu a sawi bawk.
DMF Fund-te tha taka hman a nih theih nan Line Department-te chu an mamawhna te lo zirchiangin, ngaihtuahna lo seng se ti a rel a ni a; theihtawpa Monitoring leh Illegal Miners te zawnchhuah an nih theih nan YMA leh VC te nen thawhhona tha tak neih a pawimawh thu pawh sawiho niin, Village Council hruaitute chu an Bial chhunga Miners/quarry neite Permit dinhmunte lo hrechiang tur leh Mining Permit neite chu royalty pek that a pawimawhzia te hrilhhriat nise ti a rel a ni a. Mining ti tur hian permit neih ngei a ngaih thu pawh inhrilhhriat thar leh nise tia rel a ni bawk.